Granit Xhaka u zgjodh mbrëmë futbollisti më i mirë i vitit në Zvicër për herë të tretë radhazi.
Ylli kosovar e fitoi këtë çmim në ceremoninë e mbajtur mbrëmë në Bernë.
32-vjeçari u ndie i lumtur për këtë mirënjohje dhe vlerësim, për kontributin e dhënë në nivelin e klubeve dhe për Kombëtaren helvetike.
“Jam mjaft i lumtur për çmimin. Ky nuk ishte viti im. Ishte viti i ynë, me pjesëmarrjen në Kampionatin Evropian. Dua t’i falënderoj të gjithë përsëri, posaçërisht trajnerin Murat Yakin, i cili më ka mbështetur, në ushtrime dhe në aspektin privat”, deklaroi Xhaka përmes një videoxhirimi pasi s’mund të ishte prezent në këtë ceremoni.
Viti 2024 ishte me të vërtetë i jashtëzakonshëm për Granit Xhakën.
Ylli kosovar e kaloi një vit përrallor, duke e fituar titullin e kampionit dhe atë historik në Bundesligë me Bayer Leverkusenin, ndërsa i fitoi edhe Kupën e Superkupën e Gjermanisë me “farmaceutikët”.
Ndër të tjera, me kuqezinjtë shkoi deri në finale të Ligës së Evropës, ku fatkeqësisht humbi në finale nga Atalanta, shkruan “Gazeta Express”.
Gjithashtu, ish-futbollisti i Baselit, Borussia Monchengladbachu e Arsenalit bëri paraqitje fantastike edhe në Euron 2024 me Zvicrën.
E krejt këto bënë që futbollisti me prejardhje llapjane të futej në listën e gjerë të “Topit të artë”, duke e shkruar historinë si futbollisti i parë shqiptar që e bën një arritje të tillë.
Ditë më parë, mesfushori kualitativ u zgjodh sportisti i vitit në Zvicër, kurse mbrëmë Xhaka e fitoi një tjetër çmim.
32-vjeçari u zgjodh futbollisti më i mirë i vitit në Zvicër për herë të tretë radhazi.
