Sot, më 11 maj 2024, partia fituese e zgjedhjeve parlamentare dhe presidenciale në Maqedoninë e Veriut, VMRO-DPMNE, i filloi negociatat me koalicionin humbës në kampin shqiptar, VLEN-in, për të ndërtuar Qeverinë e ardhshme.
Negociatat për formimin e Qeverisë së re në Maqedoninë e Veriut nisën vetëm 3 ditë pas zgjedhjeve të 8 majit, në të cilat koalicioni i partive opozitare shqiptare, VLEN, doli subjekt i dytë në kampin shqiptar, me 13 deputetë, ndërkaq “Fronti Europian” i BDI-së së Ali Ahmetit arriti të shënojë rekord historik, duke u renditur si fuqia e dytë në Kuvendin e Maqedonisë së Veriut me 19 deputetë, shkruan Demokracia.com.
Ali Ahmeti theu rekordin personal | “Fronti Europian” i BDI-së shkroi historinë, u bë fuqia e dytë politike në Kuvendin e Maqedonisë (Rezultatet 2014, 2016, 2020 dhe 2024)
Por, pavarësisht këtyre rezultateve, drejtuesit e partive opozitare shqiptare, Bilall Kasami nga “Lëvizja Besa”, Izet Mexhiti nga “Lëvizja Demokratike”, Afrim Gashi nga “Alternativa” dhe Bekim Qoku përfaqësuesi i “Vetëvendosjes”, kanë vendosur të mos e njohin vullnetin e shqiptarëve në Maqedoninë e Veriut.
VLEN-I E NISI RRUGËN E VLAN-IT PËR T’IA VJEDHUR BDI-SË VENDIN NË QEVERI
Rruga që filluan sot, VLEN dhe VMRO-DPMNE, është shkelje e parimit demokratik të ndërtuar në këtë shtet, sipas të cilit, fituesi nga kampi maqedonas bashkëqeverisë me fituesin në kampin shqiptar, por që nuk përjashton edhe partitë e tjera t’i bashkoheshin këtij koalicioni qeveritar.
Një rrugë e tillë po i hedh themelet e defaktorizimit të shqiptarëve në Maqedoninë e Veriut, pasi VMRO-DPMNE ka shprehur hapur qëllimin shumë kohë para zgjedhjeve, që preferon ta mbajë jashtë Qeverisë BDI-në e Ali Ahmetit, edhe nëse arrin të dalë forca e parë në kampin shqiptar.
Ish-partia e Nikola Gruevskit, VMRO-DPMNE, parapëlqen të marrë në Qeverinë e saj koalicionin e brishtë të partive opozitare shqiptare të mbështetura nga Albin Kurti, të cilat mbahen bashkë vetëm nga ideja e kundërshtimit të BDI-së.
VLEN-i që mbështetet nga Kurti e ka të gatshme edhe idenë sesi mund t’i vidhet pushteti partisë që fiton zgjedhjet. Kjo ka ndodhur në vitin 2014 në Kosovë dhe në ballë të idesë qëndronte asokohe edhe opozitari Albin Kurti, i cili ishte bashkuar me LDK, AAK dhe Nisma, duke mos lejuar që partia fituese, Partia Demokratike e Kosovës (PDK), të krijonte institucionet e reja.
