Vizituan Stacionin Ndërkombëtar të Hapësirës, kthehen astronautët nga Turqia, Italia dhe Suedia

Astronautët nga Turqia, Italia dhe Suedia u kthyen në tokë pas një vizite private trejavore në Stacionin Ndërkombëtar të Hapësirës në orbitën e Tokës. Ekuipazhi u kthye në kapsulën e kompanisë private “SpaceX”, e cila ra në Oqeanin Atlantik në brigjet e Floridës, e ngadalësuar nga një parashutë. Fluturimi drejt stacionit hapësinor është organizuar nga kompania “Axiom Space” nga Hjustoni, ku punon ish-astronauti i NASA-s, Michael Lopez Alegria, i cili ka shoqëruar tre pasagjerët.

Financimi për fluturimin u sigurua nga Turqia, Italia dhe Suedia, të cilat paguan 55 milionë dollarë për person për biletat. Ky ishte misioni i tretë i “Axiom Space”, i cili planifikon një tjetër këtë vit.

Në këtë mision morën pjesë ish-piloti turk dhe kapiteni i Turkish Airlines, Alper Gezeravci, koloneli i Forcave Ajrore Italiane, Walter Viladei dhe suedez Markus Vant, ish-pilot luftarak dhe kandidat për astronaut për Agjencinë Evropiane të Hapësirës.

Gezeravci, si turku i parë në hapësirë, ka falënderuar Turqinë për guximin dhe vendosmërinë për ta dërguar atë në hapësirë në nder të 100-vjetorit të saj si republikë.

Ndërsa ishin në stacion, astronautët kryen eksperimente shkencore dhe biseduan me studentë dhe zyrtarë nga vendet e tyre. Ata qëndruan në Stacionin Ndërkombëtar Hapësinor disa ditë më shumë se sa ishte planifikuar, për shkak të pritjes për kushte të favorshme moti për kthimin në tokë.