Komisioni Qendror i Zgjedhjeve ka treguar arsyen se përse ende nuk janë publikuar rezultatet preleminare.
Në një përgjigje për Indeksonlin, zëdhënësi i këtij institucioni ka thënë se është shkelur një procedurë gjatë procesit zgjedhor.
‘’Ju njoftoj se arsyeja pse ende nuk janë publikuar rezultatet preliminare për subjektet politike nga 21 vendvotime apo 0.83% e tyre është se pas numërimit të votave të subjekteve politike, materiali zgjedhor, përfshirë edhe formularët e rezultateve, janë vendosur brenda kutive të votimit dhe jo mbi to, siç e parashihet me procedurë. Andaj, të dhënat nga këto vendvotime nuk mund të përditësohen tani, pasi hapja e kutive të votimit nuk mund të bëhet në këtë fazë, por vetëm kur të fillojë procesi i numërimit të votave të kandidatëve për deputetë’’, ka thënë Elezi.
Theksojmë se sipas përditësimit të fundit, në platformën elektronike të rezultateve, janë ngarkuar të dhënat nga 2,512 (99.17%) vendvotime nga gjithsej 2,533.
Numërimi i fletëvotimeve për subjektet politike ka përfunduar më 9 shkurt
