Ish-presidenti republikan i SHBA-së, Donald Trump (2017-2021), dhe nënpresidentja demokrate Kamala Harris kanë bërë fushatë në dy shtete kyçe të Midwest-it, Michigan dhe Wisconsin, vetëm disa ditë para një zgjedhjeje presidenciale të ngushtë që do të përcaktojë të ardhmen politike të vendit për katër vitet e ardhshme, informon EFE.
Të dy kandidatët kanë ndaluar në disa pika në këto dy shtete, Michigan dhe Wisconsin, dhe e kanë përfunduar ditën në Milwaukee, në ngjarje fushate të organizuara vetëm disa kilometra larg nga njëri-tjetri.
Gjithashtu, të dy kandidatët kanë theksuar propozimet e tyre për vendin dhe çfarë i dallon ata nga njëri-tjetri.
Harris është përqendruar te rëndësia e votës së të rinjve, të cilët i ka quajtur “premtimi” i SHBA-së, dhe ka insistuar në vizionin e saj për unitet dhe bashkëpunim me republikanët, ndërsa Trump ka theksuar “dashurinë për vendin” dhe ka pohuar se demokratja “e urren” kombin.
“Ajo nuk është një person i mirë (…) Besoj se ajo e urren vendin,” u ka thënë ish-presidenti mbështetësve të tij dhe ka shtuar se mendon që ish-prokurorja është “inkompetente” dhe ka qenë “nënpresidentja më e keqe në histori.”
Harris, nga ana e saj, ka këmbëngulur në nevojën për të bashkëpunuar me partinë e Trump-it: “Premtoj të kërkoj një terren të përbashkët dhe të gjej zgjidhje të arsyeshme për sfidat me të cilat përballemi.”
Në aktivitetin e Harris morën pjesë disa artistë, përfshirë rep-artistet GloRilla dhe Cardi B. Kjo e fundit mbajti një fjalim ku zbuloi se vendosi të votojë kur nënpresidentja e zëvendësoi Joe Biden në garën për Shtëpinë e Bardhë.
Trump apelon tek votuesit arabë dhe Biden tek klasa punëtore
Para se të udhëtonte për në Milwaukee, Trump vizitoi qytetin Dearborn (shteti Michigan), i konsideruar “kryeqyteti arab” i Shteteve të Bashkuara, për të kërkuar vota nga komuniteti arab dhe mysliman, shumë i pakënaqur me demokratët për mbështetjen që ata kanë dhënë ndaj ofensivës izraelite në Rripin e Gazës.
Duke qenë në vizitë në një restorant me pronarë arabë, magnati nga New York-u deklaroi se, nëse fiton zgjedhjet, do të ketë “paqe në Lindjen e Mesme,” megjithëse nuk dha detaje se si do ta realizonte këtë.
Trump është pyetur nga shtypi në lidhje me polemikën e shkaktuar të enjten, kur ai sugjeroi se ish-anëtarja republikane e Kongresit, Liz Cheney, e cila është në konflikt me ish-presidentin, duhet të dërgohet përpara një skuadre pushkatimi. Larg nga korrigjimi, republikani e ka sulmuar sërish Cheney, duke thënë për të se është një mbështetëse e luftës, “shumë e trashë,” “një person i paaftë” dhe “budallaqe.”
Presidenti Joe Biden, i cili ka vizituar disa qytete për të mbështetur kandidaturën e Harris, u shfaq të premten në selinë e një sindikate në Filadelfia për të evidentuar punën e qeverisë së tij në mbështetje të punëtorëve, përfshirë mbrojtjen e pensioneve.
“Klasa e mesme e ndërtoi këtë vend, dhe sindikatat ndërtuan klasën e mesme,” deklaroi Biden, duke përsëritur një nga frazat e tij më të njohura dhe duke marrë duartrokitje nga të pranishmit.
Sindikatat kanë përfaqësuar një shtyllë themelore në mbështetjen politike për Biden gjatë gjithë karrierës së tij politike, dhe tani presidenti po përpiqet ta transferojë këtë mbështetje nga klasa punëtore drejt Harris në shtete ku klasa punëtore ka një peshë të rëndësishme elektorale, si Pensilvania, Michigan dhe Wisconsin.
Michigan dhe Wisconsin janë pjesë e shteteve të njohura si “muri blu”, tradicionalisht demokrat për shkak të votës së afro-amerikanëve urbanë dhe të klasës punëtore të bardhë, por në vitin 2016 këto shtete anuan në favor të ish-presidentit Donald Trump.
Biden i rikuperoi për demokratët në vitin 2020, por katër vjet më vonë janë përsëri në rrezik: sondazhet parashikojnë një garë të ngushtë, me Harris që kryeson ndaj Trump-it me një diferencë prej vetëm një për qind, sipas portalit FiveThirtyEight.
