Që Jasir Asani, na ka dhuruar emocione të forta përgjatë fushatës kualifikuese, për në kampionatin europian, duke u bërë idhulli me i ri për tifozerinë Kuq e Zi, kjo tashmë nuk përbën më lajm. Golat e tij spektakolarë, kanë bërë “bujë” anembanë kontinentit dhe padyshim e kanë kthyer Asanin në një prej futbollistëve më të përfolur. Në këtë jehonë pozitive, nuk mund të mungonte as komenti i teknikut Sylvinho për të, i cili tregon se si e pikasi talentin e Asanit dhe momenti në të cilin vendosi ta thërrasë për ta bërë pjesë të kombëtares.
Në një intervistë për BBC Sport, tekniku i përfaqësueses tonë ka treguar:
Në fillimet e 2023 ai arriti në zyrën e tij në Tiranë me ish lojtarin e City dhe West Ham, mbrojtësin Pablo Zabaleta dhe mesfushorin e Middlesbrough Doriva si asistentë të tij. Në total ndoqën 240 klipe ndeshjesh për të arritur në një listë fillestare me 70 lojtarë, duke skarcuar dhe kaluar në 39 të tillë derisa arritën tek 23 lojtarë për ndeshjen e parë hapëse me Poloninë për Kualifikueset e Euro2024.
Ndërmjet tyre ishte atë kohë dhe i majti i Wycombe Anis Mehmeti.
Ai asnjëherë nuk kishte qenë në radarin e Shqipërisë por u ftua si pjesë e procesit të ringritjes që Sylvinho filloi nga dita e parë.
“Zaba (Zabaleta) kishte luajtur për një kohë të gjatë në Angli kështu që kishte ende kontakte atje dhe na solli shumë informacione për Mehmetin.
Filluam ta ndiqnim në Ligën 1, por menjëherë pas kësaj, ai firmosi me Bristol City duke na bërë të mendojmë: Ok, potencialin që po e shohim ne, po e shohin dhe të tjerë.
E dinim se kishte shumë shqiptare të tjerë si ai që luanin jashtë”, ka theksuar Sylvinho për “BBc Sport”.
Gjithë ajo punë e madhe u shpërblye. Pavarësisht se humbën ndeshjen e parë 1 -0 kundër Polonisë, Shqipëria kaloi e palëkundërur deri në fund të fushatës së tyre, duke përfunduar në vendin e parë në grupin e tyre dhe duke siguruar kualifikimin për në Euro pa mbaruar ndeshja e fundit.
Një arritje e tillë e ktheu Silvinjon me një status heroi.
Ishte vetëm hera e dytë në histori që Shqiponjat do të ishin në Europian, pasi bënë debutimin e tyre të parë në 2016.
“Jetoj në një hotel që ndodhet vetëm 2 km larg ndërtesës së FSHF kështu që ndonjëherë eci në këmbë përmes një parku shumë të bukur dhe takohem me fansa. Ata zakonisht vijnë dhe më thonë: respekte Mister”, buzëqesh trajneri 50 vjeçar.
Nuk do të jetë e thjeshtë në Gjermani, pas një shorti që i vuri shqiptarët në krah me kampionët në fuqi Italinë, Kroacinë dhe Spanjën.
“Nuk po shkojmë të bëjmë qef gjithsesi. Detyra jonë nuk ka përfunduar akoma dhe nëse kemi ndonjë shans për të avancuar një stad më tej, do të luftojmë për të në të njëjtën mënyrë sic bëmë në kualifikueset”, thotë ndër të tjera braziliani.
Të gjesh sulmuesin perfekt në ligën koreane
Meqë kishte punuar më parë si një asistent në kombëtaren Braziliane, ndërmjet korrikut 2016 dhe prillit 2019, Silvinjo nuk ishte i panjohur në futbollin ndërkombëtar.
Një nga detyrat që mori përsipër ishte të ndërronte formacionin që kishte marrë nga 3-5-2 dhe ta adaptonte në 4-3-3.
Kishte vec një cështje që nuk ishte mësuar në vendin e tij të lindjes, e kishte të nevojshëm një sulmues krahu të këmbës së majtë që ta bënte të ecte kjo skemë, por thjesht nuk e kishte.
Kështu që ai dhe stafi i tij hynë në database të Federatës për të parë për një lojtar me këto karakteristika, dhe në fund erdhën me dy emra një prej të cilëve ishte 29 vjecari Jasir Asani që luante në Korenë e Jugut.
“Po ndiqnim videot e tij nga koha në futbollin e Hungarisë dhe isha gati i çuditur, kush është ky? Ai kishte gjithçka që donim. Ishte i jashtëzakonshëm në situatat një me një, mund të gjuante mirë dhe ishte i shpejtë.
Kështu, për disa të shtuna rresht, shkonim në zyrë në orën 9 am, për të parë ndeshjet e tij se kishte diferencë oraresh”, tregoi 50-vjeçari.
Në fund gjithcka ia vlejti.
Asani u provoi se ishte një goditje në shenjë. Lojtari që kishte lindur në Maqedoninë e Veriut bëri një përshtypje të madhe dhe përfundoi kualifikueset me tre gola dhe dy asiste.
Ata dinë si të godasin nga distanca
Silvinjo beson fort se asgjë nga këto nuk do të mundësohej nëse ai nuk do të vendoste të linte familjen pas në Porto dhe të zhvendosej në një dhomë hoteli në Tiranë.
“Më thanë se kjo do të funksiononte në momentin që lajmëroja se do të doja të jetoja këtu. Më lejoi që të kuptoja plotësisht identitetin lokal dhe të isha 100 përqind i fokusuar te puna ime” thotë trajneri takimet me të cilin zhvillohen në gjuhën italiane.
Stili i tij agresiv i sulmit ka bërë përshtypje edhe tek fansat më skeptikë që në fillim nuk ishin të bindur nga ndërmarrjet e tij të mëparshme në Lyon dhe Corinthians.
Shqipëria vecanërisht ka bërë përshtypje për shënimet e golave në rrugën drejt Gjermanisë.
“Ata vërtet e dinë sesi të gjuajnë topin nga distanca, e kanë të përbrendshme dhe mua kjo më pëlqen shumë, i inkurajoj ta bëjnë . Nëse mendojnë se është gjëja e duhur për tu bërë, jepini, mos ndaloni”, pëfundon timonieri i Shqipërisë për “BBC Sport”.
