Reshjet e borës, shiut dhe erërat e forta shkaktuan kaos në Mbretërinë e Bashkuar të shtunën, ndërsa shiu i madh dhe shkrirja e borës do të shkaktojnë përmbytje në të gjithë vendin të dielën.
Parashikuesi i Met Office Jason Kelly e përshkroi stuhinë Bert si një “ngjarje me shumë rrezik” dhe për të dielën, ai tha se shiu pritej të bëhej “veçanërisht i fortë dhe i vazhdueshëm”. Shirat prej 50 deri në 75 mm priten të bien në të gjithë Mbretërinë e Bashkuar, me disa vende që shohin 100 deri në 150 mm, tha Kelly.
Më shumë se 200 alarme dhe paralajmërime për përmbytje u vendosën në Angli në orët e para të mëngjesit të së dielës, me 63 të tjera në Uells dhe shtatë në Skoci. Disa paralajmërime për erë dhe shi janë lëshuar në të gjithë Skocinë, Irlandën Veriore dhe pjesë të Uellsit dhe Anglisë jugore, me paralajmërimin e Met Office se ka të ngjarë vonesa në transportin hekurudhor, ajror dhe traget.
Policia e Hampshire tha se një burrë rreth të 60-ave vdiq pasi një pemë ra mbi një makinë në A34 pranë Winchester të shtunën në mëngjes. Policia tha se po hetonte nëse incidenti ishte i lidhur me motin. Një paralajmërim i verdhë për shi dhe erë ishte në fuqi në të gjithë rajonin.
Në Uellsin Verior, pesë të rritur dhe pesë fëmijë u shpëtuan nga një shtëpi pas një rrëshqitje dheu. Një tjetër rrëshqitje dheu është raportuar në zonë, por askush tjetër nuk është prekur.
Në Irlandë, të paktën 11,000 shtepi ishin pa energji deri në mbrëmje për shkak të efekteve të stuhisë. Kompania e energjisë elektrike ESB Networks tha më herët të shtunën se të paktën 60,000 shtëpi, ferma dhe biznese kishin mbetur pa energji për shkak të motit.
“Ekuipazhet do të vazhdojnë të punojnë deri në orët e vona të mbrëmjes për të rikthyer energjinë tek shumica e klientëve që janë pa energji sot”, thuhet në njoftim. “Ndërsa ne po bëjmë gjithçka që mundemi, pritet që disa klientë të mbeten pa shërbim brenda natës”.
Rrjeti i shpërndarjes së energjisë elektrike të Rrjetit Kombëtar, i cili lidhet drejtpërdrejt me shtëpitë dhe bizneset në Midlands, Anglinë Jugperëndimore dhe Uellsin e Jugut, konfirmoi se kishte 4,345 objekte pa energji. Sekretari i Energjisë Ed Miliband tha se ministria e tij “do të jetë në kontakt të ngushtë me kompanitë e energjisë”.
Një zëdhënës i Met Office tha se erërat deri në 131 km/h u regjistruan në Uells, ndërsa 13 cm dëborë ranë në Staffordshire në ditën e parë të fundjavës. Moti shkaktoi gjithashtu ndërprerje të konsiderueshme në atraksionet turistike, me kopshtin zoologjik të Edinburgut dhe Tregun e Krishtlindjeve të Glasgout të mbyllur të shtunën. Gjithashtu në Skoci, Këshilli i Perth dhe Kinross anuluan ngjarjen vjetore të ndezjes së dritave të Krishtlindjeve në Perth për shkak të problemeve me sigurinë dhe transportit. Blackburn e ka shtyrë ndeshjen e ligës me Portsmouth për shkak të “shiut të rrëmbyeshëm” që e bëri fushën “të papërshtatshme”.
