Grupet e armatosura kundër regjimit të Bashar Asadit në Siri po përleshen me forcat e regjimit, teksa kanë filluar të hyjnë në periferi të qendrës së qytetit Hama, transmeton Anadolu.
Grupet kundër regjimit, të udhëhequra nga Hayat Tahrir al-Sham (HTS), të cilat janë përleshur me forcat e regjimit të Asadit që nga 27 nëntori, po përparojnë në drejtim të provincës Hama.
Grupet e armatosura kundër regjimit filluan të hyjnë në lagjet Al-Mazarib, Sanayi dhe Al-Arbain në lindje të qendrës së qytetit.
Ndërsa përleshjet e dhunshme vazhdojnë, avionët luftarakë rusë mbështesin forcat e regjimit sirian.
Grupet e armatosura kundër regjimit rrëzuan një nga dy helikopterët që u ngritën nga Aeroporti Ushtarak i Hamës rreth qendrës së qytetit. Helikopteri tjetër që u godit bëri një ulje emergjente.
Grupet që u përleshën me forcat e regjimit në perëndim të qendrës së qytetit Hama morën fshatrat Erze, El-Wahshiyye, Kefertun dhe Yadigun dhe u drejtuan drejt Aeroportit Ushtarak Hama në jugperëndim të qendrës së qytetit.
– Zhvillimet në Siri
Më 27 nëntor, shpërthyen përleshje midis forcave të regjimit të Asadit dhe grupeve të armatosura kundër regjimit në zonën rurale perëndimore të provincës Alepo në Sirinë veriore.
Grupet e armatosura kundër regjimit, të cilat më 28 nëntor përparuan me shpejtësi drejt Alepos, morën nën kontroll pjesën më të madhe të qendrës më 30 nëntor.
Pasi morën kontrollin e qytezës Khan Shaykhun më 30 nëntor, grupet e armatosura morën kontrollin në gjithë Idlibin, ndërsa vazhdojnë avancimin e tyre duke u përleshur në qytetin Hama.
Në operacionin “Agimi i Lirisë” që Ushtria Kombëtare Siriane nisi kundër organizatës terroriste PKK/YPG më 1 dhjetor në periferi të Alepos, u çlirua qendra e qytezës Tel Rifat.
