Kryetari i Shoqatës së Sigurimeve dhe Byrosë se Sigurimeve Kadri Morinaj, në një konferencë për mediat në Tiranë, ka shpjeguar aludimet për rritjen e çmimit të siguracioneve për vitin 2025. Morinaj sqaroi si do përllogaritet primi në përafrim me legjislacionin e BE-së.
“Ky vit filloi me një zhvillim të rëndësishëm, që është diferencimi i primeve për kategorinë e autoveturave bazuar në faktoret e riskut, i cili në themel ka kujdesin ndaj klientit, por dhe qëndrueshmërinë e tregut.
Shoqërite e Sigurimit e kanë mirëpritur këtë skemë të re të llogaritjes së primit mbi bazën e faktorëve të riskut. Shoqëritë e sigurimit në Europë kanë vite që e aplikojnë. Klientët që nuk kanë dëme përfitojne bonus 3-10%, në vitin 2026”- tha Morina.
Në përllogaritjen e riskut do të kenë rëndësi vjetërsia e makinës dhe kubikazhi i saj, çmimi i makinës, mosha e përdoruesit, e po ashtu edhe historiku i dëmeve.
“Mosha e makinës ka ndikim pasi është synuar mbështetja për makinat e reja, përfshirë edhe ato elektrike, apo hibride. Makinat me kubikazh të ulët përfitojnë ulje të primit nga 3-10%”, tha Morina.
Ndërsa foli në emër të gjithë kompanive dhe vlerësoi performancën e kompanive sidomos pas tërmetit të vitit 2019, Morina, tha se vetëm në 15 ditët e para të janarit tregu i siguracioneve ka pasur një rritje të numrit të të siguruarve në masën 7%, krahasuar me 2024 qe rritja ishte 9%.
