Me gjithë apelet, planet dhe premtimet e shumta për uljen e ndotjes, Shkupi nuk mund të shpëtojë nga ajri i ndotur. Sot, qyteti ynë është gjetur sërish në vendin e 9-të në botë për ndotjen, sipas raportit ndërkombëtar të cilësisë së ajrit, IQAir, transmeton Portalb.mk.
Ky është një problem që kërcënon çdo ditë shëndetin dhe cilësinë e jetës së qytetarëve. Më të prekurit janë më të rinjtë, të sëmurët kronikë dhe të moshuarit, të cilët janë të detyruar të jetojnë në kushte që i ngjajnë një fatkeqësie ekologjike.
Ndryshe, qytetet në Maqedoninë e Veriut gjatë gjithë këtij muaji janë gjetur në krye të listave famëkeqe të matjes së cilësisë së ajrit në botë për nga ndotja e ajrit.
LEXO: Shkupi mëngjesin e sotëm u gjend sërish në listën e kryeqyteteve me ajër më të ndotur në botë
Hulumtimi i fundit i UNDP-së për përcaktimin e burimeve të ndotjes së ajrit, si dhe as Raporti i Komisionit Evropian për progresin e reformave të vendit në vitin 2024, më në fund bënë që politikanët dhe institucionet në Maqedoninë e Veriut të ndërmarrin masa urgjente.
Kontrollet inspektuese të industrisë dhe kantiereve të ndërtimit, regjim i veçantë qarkullimi për mjetet e rënda të mallrave, reduktimi i përdorimit të automjeteve zyrtare të administratës dhe lirimi nga detyrimet e punës të grupeve të ndjeshme dhe grave shtatzëna, janë pjesë e masave afatshkurtra që qeveria dhe Ministria e Mjedisit kanë përfshirë në Planin e ri të veprimit për uljen e ndotjes së ajrit. Për këto masa është miratuar urdhri që të zbatohet në rastet kur ndotja do të kalojë kufijtë e alarmit.
