Në të gjithë territorin e Bashkisë së Lezhës është ndaluar shitja e mishit të derrit dhe kafshës së gjallë pas shfaqjes së një tjetër vatre me sëmundjen e Murtajës Afrikane. Në Ishull-Lezhë do groposen 130 derra dhe zona është në karantinë.
Lezhe- Një tjetër vatër shfaqet me sëmundjen e Murtajës Afrikane të derrave në Lezhë. Pas rastit në Malin e Rrencit në nëntor, në 25 dhe 26 dhjetor sëmundja prek edhe derrat në Ishull-Lezhë.
Mbi 50 derra kanë ngordhur në këtë zonë dhe po vijon procesi i groposjes së tyre nga autoritetet e veterinarisë dhe ferma e prekur u fut në karantinë. Por në këtë fermë të prekur do të asgjësohet e gjithë tufa prej 130 krerësh derra.
Ministria e Bujqësisë urdhëroi ndalimin e shitjes së mishit të derrit dhe kafshës së gjallë në mjedise të hapura dhe tregjet e kafshëve të gjalla në të gjithë territorin e Bashkisë së Lezhës. Vatra e identifikuar ndodhet pranë zonës së banuar ku janë shumë familje që mbajnë derra. Grupet e Shërbimit Veterinar në Lezhë vijojnë monitorimin e zonës që të parandalohet përhapja e sëmundjes. Murtaja afrikane e derrit u shfaq për herë të parë në Lezhë në fund të nëntorit në zonën e Malit të Rrencit në Shëngjin ku u konstatuan 10 derra të ngordhur, kryesisht të egër.
Murtaja Afrikane e Derrave nuk është një sëmundje që prek njeriun. Sipas Institutit të Shëndetit Publik deri tani nuk ka asnjë rast të transmetimit të sëmundjes nga kafsha tek njeriu, apo nga derrat në kafshë të tjera.
