Rusia dhe Kina po përpiqen të destabilizojnë NATO-n përmes akteve të sabotimit dhe sulmeve kibernetike, tha të mërkurën Sekretari i Përgjithshëm i NATO-s Mark Rutte, raporton dpa.
Rutte tha se “përshkallëzimi i fushatës së veprimeve armiqësore të Rusisë kundër vendeve të NATO-s” do të kërkojë që Aleanca të ndajë më mirë informacionin për të koordinuar mbrojtjen e infrastrukturës kritike.
Ministrat e Jashtëm të NATO-s ndodhen në Bruksel për ditën e dytë të takimeve në selinë e Aleancës, ku në krye të agjendës kanë sulmet hibride të Rusisë dhe Kinës.
Ministri i Jashtëm çek Jan Lipavsky tha se ka pasur 500 incidente të dyshimta në Evropë në vitin 2024 dhe se pothuajse 100 prej tyre mund t’i atribuohen Rusisë.
NATO duhet t’i dërgojë një sinjal të fortë Moskës se aktivitete të tilla nuk do të tolerohen, tha Lipavsky. “Është shumë e rrezikshme”, theksoi ai.
Një zyrtar i lartë i NATO-s deklaroi në margjinat e takimit të ministrave të jashtëm se Aleanca ka frikë nga akte të reja serioze sabotazhi dhe sulmesh kibernetike në territorin e saj.
Zyrtari tha se Rusia në veçanti duket se po bëhet më e gatshme për të rrezikuar jetët përmes sabotimeve në vendet anëtare të NATO-s.
Kina, Irani dhe Koreja e Veriut janë gjithashtu aktive në sulme të tilla kibernetike, citohet të ketë thënë zyrtari. Pekini, si Moska, po zhvillon një fushatë për të përhapur malware (softuer i krijuar për të prishur një kompjuter, server ose rrjete për qëllime përfitimesh të paligjshme – n.r.), shpjegoi ai.
Qëllimi është të kryhen aktivitete spiunazhi, por edhe të kenë aftësinë për të shkaktuar përçarje në rast të rritjes së tensioneve. Rusia po fokusohet në infrastrukturën kritike dhe veçanërisht në sistemet e kontrollit industrial, tha zyrtari i NATO-s.
Ai dha një shembull të një sulmi të madh – ndoshta të kryer nga Irani – ndaj vendit anëtar Shqipërinë, si pasojë e të cilit sistemi i kontrollit kufitar të tij u paralizua.
Gjithashtu, në internet janë publikuar dokumente të Ministrisë së Brendshme, përfshirë ato të policisë, emailet e shkëmbyera mes punonjësve të policisë, identitetin e dëshmitarëve sekretë dhe dosjet e Interpolit, shpjegoi zyrtari i NATO-s.
Ministrja e Jashtme gjermane Annalena Baerbock i bëri thirrje NATO-s që të rrisë mbrojtjen e infrastrukturës kritike, si kabllot dhe tubacionet e telekomunikacionit detar, duke kryer misione patrullimi shtesë dhe duke intensifikuar shkëmbimin e informacionit.
Para fillimit të takimit, Annalena Baerbock deklaroi se Deti Baltik është një zonë prioritare ku duhet të intensifikohen përpjekjet e monitorimit dhe bashkëpunimit të NATO-s.
Ministri i Jashtëm gjerman përmendi gjithashtu ndërprerjen e sinjalit GPS si një shembull tjetër të aktiviteteve hibride të Rusisë.
