Grupi gjerman Rheinmetall ka ndërmarrë një hap të ri drejt ndërtimit të një fabrike të re që do të prodhojë predha artilerie të kalibrit 155 mm në Lituani, raporton të premten DPA.
Kompania gjermane dhe qeveria lituaneze nënshkruan të premten një marrëveshje qiraje për një pronë me një sipërfaqe prej 340 hektarësh në qytetin Baisogala dhe një kontratë për blerjen e municionit 155 mm.
Autoritetet e Vilnius thanë se fabrika do të fillonte të funksiononte në mesin e vitit 2026 dhe do të prodhonte dhjetëra mijëra predha në vit.
Rheinmetall planifikon të investojë rreth 180 milionë euro në fabrikën e re dhe të krijojë 150 vende pune.
Kompania këtë pranverë konfirmoi planet për të ndërtuar një fabrikë municionesh artilerie në Lituani dhe nënshkroi një letër qëllimi me qeverinë në Vilnius. Parlamenti lituanez miratoi disa ndryshime legjislative për të lehtësuar investimet në kompanitë e industrisë së mbrojtjes.
“Nuk kam asnjë dyshim se ky projekt do të zbatohet sa më shpejt në dritën e rritjes së kërkesës për municione në Evropë dhe NATO”, deklaroi kryetarja e ekzekutivit lituanez Ingrida Simonyte pas nënshkrimit të marrëveshjeve.
“Ne në Rheinmetall jemi shumë mirënjohës për besimin që Lituania na ka dhënë”, tha drejtori ekzekutiv i Rheinmetall, Armin Papperger.
Grupi Rheinmetall është tashmë aktiv në Lituani dhe nga vera e vitit 2022 operon një qendër mirëmbajtjeje së bashku me kontraktorin KNDS.
