Qeveria Kurti nxit përçarjen mbarëkombëtare | Zv/kryeministri Bislimi nuk e dëshiron ndihmën e Shqipërisë, Edi Ramën e quan “ndërkombëtar”, “nga një shtet tjetër”, i cili “nuk na vyen”

Një nga deklarimet skandaloze të Besnik Bislimit në intervistën e dhënë për emisionin Konfront në televizionin Koha – në një intervistë përplot deklarime të tilla – ka qenë edhe përshkrimi që zëvendës-kryeministri i Kosovës i ka bërë kryeministrit të Shqipërisë.

I pyetur nga gazetarja se a kanë komunikuar me Edi Ramën që kur të takohet me Sekretarin e Shtetit Amerikan, Antony Blinken, t’i flas për Kosovën dhe qëndrimin e Kosovës për vendimin për dinarin, Bislimi është nervozuar nga pyetja duke iu kthyer gazetares se nuk kanë nevojë “për ndërkombëtar nga shtetet tjera” që të komunikojnë me Amerikën.

“Ndërkombëtar nga një shtet tjetër” është konsideruar nga Bislimi kryeministri i Shqipërisë.

Më saktësisht, ai tha se “nuk na vyejnë ndërkombëtarë nga vendet e tjera për t’ia komunikuar qëndrimet tona SHBA-ve”.

Biseda u zhvillua kështu:

Gazetarja: Nesër në Tiranë do të jetë sekretari Blinken. Keni komunikuar me kryeministrin Rama për të koordinuar një qëndrim, një porosi që do të mund t’i jepej sekretarit Blinken, në mënyrë që të sqarohen këto, le të themi, keqkuptime, që ju po insistoni në të drejtën e shtetit tonë ndërkohë që SHBA-ja po dërgon mesazhe që ky qëndrimi i njëanshëm mund t’i kushtojë Kosovës me lëndim partneriteti?

Besnik Bislimi: Nuk e kuptoj pse në vazhdimësi po i referoheni këtij konstatimi dhe po e prezantoni si kërcënim? Raporti mes Kosovës dhe SHBA-ve është i ndërtum në princime, jo në kërcënime.

Gazetarja: E qartë, por deklarata të tilla nuk janë aspak shqetësuese?

Besnik Bislimi: Po çdo deklaratë për neve e merr trajtimin e merituar, por qeveria nuk qeverisë me kërcënime, por me politika e me ligje. Ne kemi një ambasador në SHBA, SHBA-të kanë një ambasador në Kosovë. Ne kemi linja të komunikimit direkt, nuk na vyejnë ndërkombëtarë nga vendet e tjera për t’ia komunikuar qëndrimet tona SHBA-ve.

Gazetarja: Megjithatë po më intereson të di nëse përmes kryeministrit Rama t’i sqarohet ky qëndrim zotërit Blinken?

Por, Bislimi nuk ishte i gatshëm të jepte një tjetër përgjigje për këtë pyetje.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit./Albanian Post/