Presidenti egjiptian Abdel Fattah al-Sisi dhe udhëheqësit e Emirateve të Bashkuara Arabe, Bahreinit dhe Tunizisë do të shkojnë në Kinë këtë javë, njoftoi të hënën Ministria e Jashtme e Pekinit, raporton AFP.
Ndërmjet 28 majit dhe 1 qershorit, liderët “do të bëjnë vizita shtetërore në Kinë dhe do të marrin pjesë në ceremoninë e hapjes së konferencës së dhjetë ministrore të Forumit të bashkëpunimit Kinë-shtetet arabe”, tha zëdhënësja e Ministrisë së Jashtme kineze, Hua Chunying.
Delegacioni do të përfshijë mbretin e Bahreinit Hamad bin Isa Al Khalifa, presidentin tunizian Kais Saied dhe presidentin e Emirateve të Bashkuara Arabe sheik Mohammed bin Zayed al-Nahyan.
Kjo takim ndodh në një moment kur Kina po përpiqet të pozicionohet si ndërmjetës në konfliktin midis Hamasit dhe Izraelit.
Kina gjithmonë ka mbështetur kauzën palestineze dhe një zgjidhje me dy shtete në konfliktin izraelito-palestinez.
Presidenti kinez Xi Jinping ka bërë thirrje për një “konferencë ndërkombëtare paqeje” për të zgjidhur konfliktin.
Në nëntor, Pekini priti një takim të ministrave të jashtëm të Autoritetit Palestinez, Indonezisë, Egjiptit, Arabisë Saudite dhe Jordanisë për diskutime që synonin një “de-eskalim” të konfliktit aktual izraelito-palestinez.
Lufta në Rripin e Gazës filloi më 7 tetor, pas një sulmi në territorin izraelit nga komando Hamas të infiltruar nga Rripi i Gazës, duke shkaktuar mbi 1.170 të vdekur, shumica civilë, sipas një bilanci të AFP bazuar në shifra zyrtare izraelite.
Në atë ditë, 252 persona u morën peng në territorin palestinez. Pas një armëpushimi në nëntor që çoi në lirimin e rreth njëqind prej tyre, 121 pengje janë ende të mbajtur në Gaza, prej të cilëve 37 kanë vdekur, sipas ushtrisë.
Si përgjigje, ushtria izraelite nisi një ofensivë shkatërruese në territorin palestinez, e cila ka shkaktuar të paktën 35.984 të vdekur, kryesisht civilë, sipas të dhënave të Ministrisë së Shëndetësisë të qeverisjes Hamas.
