Në një takim të mbajtur në Bialystok, në lindje të vendit, qeveria e udhëhequr nga kryeministri Donald Tusk urdhëroi Ministrinë e Brendshme të nisë ndërtimin përkatës, me qëllim që të vështirësonte kalimin ilegal të emigrantëve nga Bjellorusia dhe të përmirësojë kushtet e punës së rojeve kufitare, ushtrisë dhe policisë polake.
Zona e ndaluar do të jetë së paku 200 metra e thellë, e në disa vende deri në dy kilometra. Kufiri Polako-Bjellorusi është i gjatë rreth 400 km.
Agjencia kombëtare e shtypit PAP, e marrë nga dpa, raportoi se Tusk njoftoi gjithashtu kushte më lejuese ligjore për përdorimin e armëve nga forcat e sigurisë.
Masa e marrë nga qeveria është një reagim ndaj incidentit në fund të majit, kur një ushtar polak u vra në kufi nga një sulm me thikë. Sipas forcave të armatosura polake, sulmi erdhi nga përtej kufirit, nga Bjellorusia. Ushtari u plagos rëndë dhe më pas vdiq.
Presidenti polak Andrzej Duda tha të hënën se do të bëhen të gjitha përpjekjet për të kapur dhe ndëshkuar sulmuesin.
Polonia dhe Bashkimi Evropian akuzojnë presidentin bjellorus Aleksandr Lukashenko për sjelljen e organizuar të emigrantëve nga zonat e krizës në kufirin e jashtëm të Bashkimit, me qëllim krijimin e presionit ndaj Perëndimit.
Në verën e vitit 2022, Polonia siguroi kufirin me Bjellorusinë duke ndërtuar një gardh 5.5 metra të lartë dhe duke instaluar një sistem mbikëqyrjeje. Pavarësisht kësaj, emigrantët përpiqen të kalojnë çdo ditë nga Bjellorusia në territorin polak, i cili është pjesë e Bashkimit Evropian dhe NATO-s.
