Masat ndëshkuese të vendosura nga Bashkimi Evropian ndaj Kosovës po qëndrojnë edhe më tej në fuqi. Derisa liderët e shtetit thuajse secilën ditë po bëjnë thirrje për largimin e tyre, zëdhënësi i BE-së, Peter Stano e bëri të qartë se kjo nuk në përgjegjësinë e Qeverisë, e as kryeministrit Kurti.
Në lidhje me këtë, zëdhënësi i Qeverisë së Kosovës, Përparim Kryeziu citohet të ketë deklaruar:
“Së pari ne të gjithë e dimë që Kosova nuk merr vendime për Bashkimin Evropian. Askush në Kosovë nuk po pretendon të kundërtën. Kryeministri Kurti në të gjitha takimet e tij me liderë evropianë dhe vendimmarrës në Bashkimin Evropian me të drejt kërkon largimin e masave sepse ato nuk reflektojnë as arsyet për të cilat janë vendosur e as situatën në terren”.
Tutje, ai ka shtruar pyetje ndaj Zyrës së përfaqësuesit të Lartë, Josep Borrell, se pse nuk po largohen masat, derisa ekziston raporti që rekomandon heqjen e tyre.
“Për më tepër që nga qershori i këtij viti ka një raport të Përfaqësuesit të Lartë BE-së, Josep Borrel në të cilin kërkohet që masat ndaj Kosovës të largohen. Pas deklarimit dhe vlerësimit të Përfaqësuesit të Lartë të BE-së, nuk është më çështje se a duhet apo jo të largohen masat ndaj Kosovës apo kush i largon ato, por pse ato nuk po largohen. Kjo është pyetja për të cilën duhet të japë një përgjigje Zyra e Përfaqësuesit të Lartë të BE-së, Josep Borrel, respektivisht z. Stano dhe Bashkimi Evropian.” – ka thënë Kryeziu, sipas RTV21.
Çka tha Stano?
Derisa kryeministri Kurti gjatë Samitit të Procesit të Berlinit bëri thirrje për heqjen e masave, Stano u përgjigj se nuk është përgjegjësi e Qeverisë së Kosovës apo shefit të saj që të vendosë.
“Nuk është Kosova dhe as kryeministri i saj që vendos nëse masat do të hiqen apo jo, ky është një vendim që duhet ta marrin shtetet anëtare. Përfaqësuesi i Lartë ka lëshuar më 3 qershor një Deklaratë në emër të BE-së, e pasuar nga raporti i HRVP-së për përmbushjen nga Kosova të kërkesave të BE-së. Diskutimet për heqjen e masave për Kosovën vazhdojnë mes shteteve anëtare në Këshill.” – u shpreh Stano.
Gjatë vizitës së tij në Berlin, në kuadër të Samitit të Procesit të Berlinit, Kurti u takua me kancelarin gjerman, Olaf Scholz.
Këtij të fundit, ai i kërkoi mbështetje për heqjen e masave ndëshkuese.
“Nga ai dhe Gjermania kryeministri Kurti kërkoi që të mbështesë largimin e masave të BE-së, gjë që tashmë është kërkuar edhe nga vetë Përfaqësuesi i Lartë i BE-së, Josep Borrell. Kurti gjithashtu kërkoi nga kancelari Scholz mbështetjen në adresimin e çështjes së hapësirës ajrore të Serbisë e cila mbetet e mbyllur për fluturime komerciale drejt dhe nga Kosova tash e 25 vjet, duke shkaktuar kështu si dëme financiare kompanive të fluturimeve ashtu edhe ndotje të mjedisit për shkak të zgjatjes së fluturimeve për dhe nga Kosova.” – thuhej në një njoftim të Qeverisë.
