Një OJQ amerikane paralajmëroi për rreziqet që paraqesin “neuroteknologjitë” për publikun e gjerë

Një OJQ amerikane paralajmëroi për rreziqet që paraqesin “neuroteknologjitë” për publikun e gjerë, duke iu referuar shitjes së pajisjeve që janë në gjendje të regjistrojnë aktivitetin e trurit apo edhe të ndikojnë në të, në mungesë të garancive të mjaftueshme për konsumatorët, raporton AFP.

Pas këtyre rekomandimeve, Kolorado u bë shteti i parë amerikan që miratoi një ligj për të mbrojtur privatësinë e “të dhënave nervore”.

“Është e para për një shtet amerikan dhe në botë në përgjithësi,” tha Jared Genser, bashkëthemelues i Fondacionit Neurorights, në një konferencë shtypi të organizuar të mërkurën.

Kjo OJQ përpiqet të lajmërojë autoritetet për rreziqet e paraqitura nga pajisjet që hyjnë në sferën e “neuroteknologjive”: shiritat e kokës për të përmirësuar gjumin, kufjet për meditim, sensorët e kafkës për të përmirësuar lojën e golfit, etj.

Këto pajisje mund të mbledhin të dhëna jashtëzakonisht personale dhe t’i analizojnë ato brenda një aplikacioni të krijuar për të informuar përdoruesin për performancën e tij, por edhe për të ndikuar në sjelljen e tij.

“Mendimet tuaja, kujtimet tuaja, imagjinata juaj, emocionet tuaja, sjellja juaj, nënndërgjegjja juaj zënë vend në tru,” theksoi neurologu Rafael Yuste, president i Fondacionit Neurorights dhe drejtor i Qendrës Neuroteknologjike në Universitetin e Kolumbisë.

Studimi i publikuar të mërkurën nga kjo OJQ tregon se kompanitë kryesore të synuara, në përgjithësi start-up-et pak të njohura, mbledhin këto të dhëna shumë personale pa u kufizuar vetëm në ato që u nevojiten për pajisjet e tyre. Dhe duke qenë se këto pajisje nuk janë të miratuara nga autoritetet rregullatore shëndetësore, ato shmangin ligjet që zbatohen për pajisjet mjekësore.

“Edhe më shqetësues është fakti se shumica e këtyre kompanive i lejojnë vetes të ndajnë të dhëna nervore me një numër palësh të treta të paspecifikuara”, tha OJQ-ja amerikane.

Specialistët e kësaj fushe janë gjithashtu të shqetësuar për rreziqet që ekzistojnë në planin afatgjatë.

“Herët a vonë, një kompani do të shesë stimulues magnetikë për të përmirësuar kujtesën. Do të jetë vala e dytë e neuroteknologjive të tregtuara për publikun e gjerë, e cila do të lejojë manipulimin e aktivitetit të trurit,” shpjegoi Raphael Yuste.

“Dhe kjo nuk është diçka fantashkencë,” këmbënguli ai, duke evokuar eksperimentet e kryera në laborator, gjatë të cilave studiuesit arritën të deshifrojnë mendimet e disa njerëzve.

Shkenca mbi të cilën bazohen projekte të tilla po përparon me shpejtësi, falë implanteve nervore, të cilat i afrohen sa më shumë sinjaleve të trurit dhe falë inteligjencës artificiale gjeneruese, e cila kontribuon në përkthimin e këtyre sinjaleve.

Pajisjet e tregtuara aktualisht synojnë një audiencë ende të kufizuar, por gjigantët në fushën e teknologjisë, si Meta dhe Apple, mund ta zgjerojnë ndjeshëm këtë treg, i cili mund të arrijë miliona njerëz.

“Apple së fundmi paraqiti një aplikim për patentë për të bashkangjitur sensorë elektroencefalografie (EEG) (të cilët matin aktivitetin elektrik të trurit) në gjeneratën e ardhshme të AirPods.