Albison dhe Rexhep Slivova, të cilët u vranë ditën e mërkurë me armë zjarri në një lokal në qendër të Klinës janë varrosur sot.
Në ceremoninë e varrimit ishte i pranishëm edhe Kryetari i Klinës, Zenun Elezaj, i cili po ashtu në llogarinë e tij në Facebook kishte shkruar për vrasjen që ndodhi në qendër të atij qyteti, duke thënë se ky lajm ka qenë i papritur dhe i kobshëm.
Ceremona e varrimit tashmë ka nisur dhe qindra pjesëmarrës po marrin pjesë, derisa një grup djemsh të rinj kanë veshur bluza me fotografitë e viktimave që humbën jetën para dy netësh nga plumbat që morën nga dorasi Jon Hoti.
Pasditen e së mërkurës, qyteti i Klinës është tronditur nga një ngjarje e rëndë. Dy të rinj mbetën të vrarë pasi u gjuajtën me armë zjarri nga një person tjetër.
Autori është arrestuar.
Rexhep dhe Albison Slivova nga fshati Jashanicë e Klinës kanë humbur jetën.
I dyshuari për këtë vrasje, menjëherë u raportua se është Jon Hoti, djali i ish-kandidatit të LDK-së për kryetar të Klinës, Besim Hotit.
Ai është arrestuar nga policia.
Fillimisht u raportua se nga të shtënat me armë një person ka mbetur i vdekur dhe një e një tjetër i plagosur, i cili ishte dërguar në emergjencën e Spitalit të Pejës.
“Rreth ores 17:15 policia është njoftuar për të shtëna me armë zjarri në sheshin “Mujë Krasniqi” në një lokal sipas informatave të para një person është pa shenja jete vdekjen e ka konstatuar mjeku kujdestar, ndërsa një person tjetër është dërguar në emergjencë”, kishte thënë zëdhënësi i policisë për rajonin e Pejës, Fadil Gashi.
Por, personi që mbeti i plagosur, nuk kishte arritur t’u mbijetonte plagëve të marra nga arma e zjarrit dhe për pasojë kishte ndërruar jetë në emergjencën e Spitalit të Pejës.
Në vendin e ngjarjes kanë dalë njësitet policore, ekipet e emergjencës dhe po ashtu personat kompentent nga Prokuroria Themelore e Pejës.
Ndërkaq, pak minuta më vonë në vendin e ngjarjes ka arritur edhe ekipi nga Instituti i Mjekësisë Ligjore.
Në lidhje me rastin është deklaruar edhe prokurorja Sahide Gashi.
“Rast tragjik që ka marrë jetën e dy personave të ri, jemi në vazhdimësi të mbledhjes së provave, ekzaminimit të vendit të ngjarjes. Trupat e pajetë është urdhëru që të dërgohen për autopsi në IML në Prishtinë. I dyshuari edhe ai i moshës së re është arritur të arrestohet falë punës së shpejtë të policisë”, ka thënë ajo nga vendi i ngjarjes.
Elezaj ka shprehur ngushëllime për familjen e dy personave që mbeten të vrarë mbrëmë.
“Me dhimbje e pikëllim të madh kam marrë lajmin për rastin e sotëm, ku mbetën të vdekur Rexhep dhe Albison Slivova nga fshati Jashanicë”.
“Ky lajm i papritur e i kobshëm tronditi thellë jo vetëm familjen e dy të ndjerëve, por na preku thellë të gjithëve. Në emrin tim dhe të Komunës së Klinës i shpreh ngushëllime të sinqerta familjes Slivova, miqve dhe të gjithë atyre që i kanë njohur Rexhepin dhe Albisonin”, thuhet në shkrimin e Elezajt.
