Misteri që lidhet me gjestin e presidentes hungareze, aleates së Orbanit, për të falur një bashkëpunëtor në pedofili; nisma e presidentes nxori njerëzit në rrugë dhe bëri që kryeministri të propozonte një ndryshim në Kushtetutë

Të paktën 1000 njerëz protestuan në kryeqytetin hungarez të premten, duke kërkuar dorëheqjen e presidentes Katalin Novak, lidhur me vendimin e saj për të falur një burrë të dënuar për bashkëpunim, pasi ai ndihmoi në fshehjen e një rasti të abuzimit seksual në një shtëpi fëmijësh, raporton Reuters.

Novak vendosi të falte rreth 20 persona në prill 2023, përpara një vizite të Papa Françeskut. Mes të falurve ishte edhe zëvendësdrejtori i një shtëpie fëmijësh, i cili ndihmoi ish-drejtorin e shtëpisë për të fshehur krimet e tij.

Drejtori u dënua me 8 vjet burg për abuzim seksual të disa djemve të mitur në periudhën 2004-2016. Zëvendësdrejtori ishte dënuar me mbi 3 vite burg.

Partitë opozitare hungareze kanë bërë thirrje për dorëheqjen e Novak, një ish-ministër i familjes dhe një aleat i kryeministrit konservator Viktor Orban.

Novak deklaroi të martën se nuk do të falte kurrë një pedofil, përfshirë në këtë rast. Ajo tha se arsyeja e vendimit të saj nuk është publike dhe se të gjitha faljet janë, për nga natyra e tyre, të diskutueshme.

Duke kërkuar të kufizojë pasojat politike nga skandali, Orban, partia e të cilit Fidesz fillon fushatën për zgjedhjet parlamentare evropiane të qershorit, paraqiti një amendament kushtetues në parlament të enjten vonë mbrëma që do t’i hiqte presidentit të drejtën për të falur krimet kundër fëmijëve.

“Vendimi për faljen e presidentes s; republikës ka ndezur një debat. Ky debat duhet të mbyllet në një mënyrë që të qetësojë të gjithë hungarezët”, thuhet në tekstin e projektligjit.

Novak tha se do të shpallte amendamentin e ligjit.

Por protestuesit që shfaqën pankarta të premten ku shkruhej “Dorëheqja!” dhe ata marshuan drejt zyrës presidenciale të Novakut në Budapest dhe deklaruan se e vetmja zgjidhje e pranueshme do të ishte që presidenti të jepte dorëheqjen.

Novak nuk ishte në zyrën e tij, por në një vizitë zyrtare në Doha.

“Dorëheqja do të ishte një gjë shumë e drejtë”, tha Bela Sedan, 53 vjeç, e cila punon si marangoz. “Dikush që bën një gabim të tillë duhet të largohet dhe të mos më përfaqësojë mua si president i Republikës së Hungarisë”, shton ai.