Mijëra iranianë u mblodhën të dielën në qendër të kryeqytetit Teheran dhe në të gjithë vendin për të shënuar 45 vjetorin e krizës së pengjeve në ambasadën amerikane në vitin 1979, raporton AFP.
Përpara ish-misionit diplomatik amerikan, iranianët valëvitën flamuj iranianë dhe palestinezë, si dhe ata të lëvizjes shiite libaneze Hezbollah të mbështetur nga Republika Islamike.
Shumë prej tyre mbanin tabela që lexonin “Vdekje Amerikës” dhe “Vdekje Izraelit” të shkruara në persisht dhe anglisht.
Para turmës në Teheran, gjenerali Hossein Salami, kreu i Korpusit të Gardës Revolucionare, ushtrisë ideologjike të Republikës Islamike, kritikoi Shtetet e Bashkuara dhe aleatin e saj izraelit.
Izraelitët dhe amerikanët “nuk mund të mbijetojnë duke masakruar muslimanët, ne gjithmonë i paralajmërojmë ata se nëse nuk ndryshojnë sjelljen e tyre, ata do të shkojnë drejt kolapsit dhe shkatërrimit”, tha ai gjatë një fjalimi televiziv.
Që prej mëngjesit të së shtunës, media shtetërore ka transmetuar himne revolucionare që denoncojnë “krimet” e Shteteve të Bashkuara kundër Iranit.
Takime të ngjashme u zhvilluan në shumë qytete të tjera të vendit, duke përfshirë Shirazin (në jug), Abadan (jugperëndim), Bandar Abbas (në jug) dhe Sari (në veri).
Më 4 nëntor 1979, më pak se nëntë muaj pas përmbysjes së shahut të fundit të Iranit, një grup studentësh mbështetës të Revolucionit Islamik sulmuan ambasadën e Shteteve të Bashkuara në Teheran, duke e akuzuar atë si një “fole spiunësh”.
Për të liruar pengjet, studentët më pas kërkuan që Shtetet e Bashkuara të ekstradojnë Shahun për të dalë në gjyq në Iran.
Kriza mbaroi vetëm 444 ditë më vonë, pas vdekjes, në Egjipt, të sovranit të rrëzuar, së bashku me lirimin e 52 diplomatëve amerikanë.
Më pas, Uashingtoni ndërpreu marrëdhëniet diplomatike me Teheranin, të cilat nuk janë rivendosur që atëherë, dhe vendosi një embargo.
Tubimi i mëngjesit të së dielës u zhvillua në një kohë kur Izraeli, armiku i shpallur i Republikës Islamike, është në luftë me disa nga aleatët e Iranit: kundër Hamasit në Gaza, por edhe në kufirin e tij verior, kundër Hezbollahut.
