Hungaria nuk do Mark Rutte në krye të NATO-s

Qeveria hungareze njoftoi të martën se nuk do të mbështesë emërimin e Mark Rutte, aktualisht Kryeministër i Qeverisë së Holandës, si Sekretar i Përgjithshëm i NATO-s.
“Ne nuk mund të mbështesim zgjedhjen si Sekretar të Përgjithshëm të NATO-s të një personi që donte të gjunjëzonte Hungarinë”, tha ministri i Jashtëm hungarez Peter Szijjarto, sipas Reuters.
Szijjarto i referohet një deklarate të Rutte lidhur me mosmarrëveshjen e gjatë midis qeverisë hungareze dhe institucioneve evropiane mbi të drejtat e pakicave seksuale.
Në kohën kur qeveria në Budapest po miratonte këtë ligj anti-LGBT, Mark Rutte tha se “Hungaria nuk ka asgjë për të kërkuar në Bashkimin Evropian” dhe se ajo duhet “të gjunjëzohet për këtë çështje”. Sekretari aktual i Përgjithshëm i Aleancës, Jens Stoltenberg, do të përfundojë mandatin e tij në tetor 2024, pasi ai tashmë ishte zgjatur katër herë në kuadër të luftës në Ukrainë. Mark Rutte tashmë ka bërë të ditur se dëshiron këtë post dhe për të kanë shprehur mbështetjen e tyre Shtetet e Bashkuara, Britania e Madhe, Franca dhe Gjermania. Por emërimi i Sekretarit të Përgjithshëm të NATO-s kërkon konsensusin e shteteve anëtare.