Gjykatësja federale që mbikëqyr çështjen penale ndaj ish-presidentit Donald Trump lidhur me dokumentet e klasifikuara, pritet të vendosë një datë për zhvillimin e gjyqit

Vendimi për caktimin e datës së gjyqit për dokumentet e klasifikuara është i rëndësishëm për arsyet se do të përcaktojë nëse kandidati kryesor i Partisë Republikane do të përballet me akuzat këtë vit për të mbajtur dhe fshehur të dhëna sekrete pas largimit nga Shtëpia e Bardhë.

Gjykimi në shtetin e Floridës është momentalisht i planifikuar për më 20 maj, por gjyqtarja Aileen Cannon ka shtyrë datën disa herë dhe pritet të rishikojë datën e gjyqit gjatë seancës së të premtes.

Prokurorët federalë kërkojnë që gjyqi të zhvillohet më 8 korrik, ndërsa avokatët e Trump thonë se një proces gjyqësor këtë vit është i pamundur për shkak të kandidaturës së tij për rizgjim në Shtëpinë e Bardhë. Ata propozuan 12 gushtin si datë të mundshme për fillimin e përzgjedhjes së jurisë.

Datat e gjyqit kanë rëndësi të veçantë për shkak të pasigurisë rreth një çështjeje tjeter federale në Uashington, ku Trump akuzohet për përmbysje të rezultateve të zgjedhjeve presidenciale të vitit 2020.

Gjykata e Lartë ka njoftuar se në fund të prillit do të dëgjojë argumentet pro dhe kundër për pretendimin e Trumpit se ai ka imunitet nga ndjekja penale, duke lënë në pasiguri nëse gjyqi për këto akuza do të zhvillohet para zgjedhjeve të nëntorit.

Nëse datat e gjyqit shtyhen pas zgjedhjeve dhe çështja në Uashington nuk fillon këtë vit, votuesit do të shkojnë në zgjedhje pa ditur rezultatin e këtyre çështjeve kundër ish-presidentit Trump.

Seanca e së premtes është e para që është e hapur për këtë çështje pas disa muajsh.

Ish-presidenti Trump përballet me 40 akuza penale në Florida, të ngritura nga prokurori i posaçëm Smith, sipas së cilave ai mori dhe fshehu dokumente të klasifikuara kur u largua nga Shtëpia e Bardhë. Ata refuzoi të kthejë dokumentet pas kërkesave të Departamentit të Drejtësisë.

Prokurorët kanë theksuar rëndësinë e rastit, duke thënë se nuk ka pasur një rast të ngjashëm më parë në historinë amerikane.

Trump dhe avokatët e tij kanë mohuar çdo shkelje dhe kërkojnë ndërprerjen e çështjes, duke përmendur argumentin e imunitetit, i cili aktualisht po shqyrtohet nga Gjykata e Lartë.