Qendrat e votimit u hapën të dielën në orën lokale 8:00 (06:00 GMT) në Francën kontinentale për raundin e dytë të zgjedhjeve të parakohshme legjislative, një votim historik ku e djathta ekstreme mund të dalë fituese, me shumë pasiguri, megjithatë, për kapacitetin e saj për të arritur shumicën absolute që do t’i lejonte të formonte një qeveri, raporton AFP.
Francezët mund të votojnë deri në orën 18:00 (16:00 GMT) ose deri në orën 20:00 (18:00 GMT) në qytetet e mëdha, orë në të cilën do të shfaqen rezultatet e para. Mobilizimi i zgjedhësve pritet të jetë ende i fortë, me pjesëmarrjen që pritet të jetë në të njëjtin nivel si në raundin e parë, kur shkalla e pjesëmarrjes arriti në 66.7%.
Në raundin e parë që u zhvillua të dielën e kaluar, partia e ekstremit të djathtë Rassemblement National (RN) ishte forca më e fortë politike, përpara një aleance të re të majtë dhe kampit centrist të presidentit Emmanuel Macron, kujton dpa.
Sondazhet e fundit të opinionit parashikojnë që RN dhe aleatët e saj do të sigurojnë midis 175 dhe 215 mandate, shumë më pak se numri i nevojshëm i mandateve për të pasur shumicën absolute. Për ta arritur atë, e djathta ekstreme duhet të fitojë 289 nga gjithsej 577 mandate.
