Festë me flamuj shqiptarë në Graçanicë, serbët ndihen të provokuar

Vetura të mbështjellur me flamuj kombëtar shqiptar kanë festuar të enjten në mbrëmje nëpër rrugën kryesore të Graçanicës.

Shqiptarët e Kosovës kanë festuar Ditën e Flamurit edhe në vendbanimin me shumicë serbe afër Prishtinës, tregojnë pamjet e publikuara nga “Kosovo-Online”, një portal lokal serb.

Kjo sjellje është konsideruar “provokim” nga kryetarja e Komunës së Graçanicës.

Ljiljana Shubariq, kryetare e komunës, ka pretenduar se ngjarja është projektuar në mënyrë që komuniteti serb të reagojë dhe të ndodhin incidente.

Gjatë mbrëmjes së të enjtes, një numër i konsiderueshëm i njësiteve policore janë parë në rrugët e Graçanicës.