Në Hollandë, të enjten në mëngjes, në orën lokale 7:30 (05:30 GMT), u hapën qendrat e votimit për zgjedhjet europarlamentare që do të zhvillohen deri të dielën në të gjithë Bashkimin Evropian, raportojnë AFP dhe Reuters.
Në orën lokale 21 (19:00 GMT) do të shpallen rezultatet e para të një sondazhi në daljen nga kutitë e votimit. Shifrat zyrtare priten të dielën në orën 21:00 GMT.
Nacionalistët e drejtuar nga Geert Wilders duket se po shkojnë drejt një rezultati të ri të mirë. Partia e Lirisë (PVV) është renditur nga një sondazh opinioni në barazim me aleancën Laburistët/Jeshilët e Majtë, me nga tetë mandate deputetësh evropianë, çka do të përbënte një fitore për Wilders, i cili nuk arriti të sigurojë një vend në Parlamentin Evropian në zgjedhjet e mëparshme, në 2019.
Atëherë, laburistët fituan gjashtë mandate dhe ekologjistët tre. Këtë vit, të dy formacionet e ekstremit të majtë kanë kandidatë në një listë të përbashkët, edhe pse do të jenë pjesë e fraksioneve të ndryshme në PE pas votimit.
Wilders është mbështetur gjithnjë e më shumë nga holandezët, të cilëve u premton të frenojë migracionin për azil. Ai fitoi kështu zgjedhjet legjislative në nëntor të vitit të kaluar. Pasuan muaj të negociatave të tensionuara, gjatë të cilave politikani 60-vjeçar arriti një marrëveshje me tre parti të tjera konservatore, së bashku me të cilat PVV do të formojë një qeveri të ekstremit të djathtë, ndoshta para fundit të qershorit.
Koalicioni qeveritar ka njoftuar se do të mbajë një qëndrim të ashpër në Bruksel, duke kërkuar që Holanda të përjashtohet nga disa rregulla të Bashkimit Evropian për dhënien e azilit dhe mjedisin, si dhe uljen ndjeshëm të kontributit holandez në buxhetin evropian.
Wilders ka mbrojtur prej kohësh që Holanda duhet madje të dalë nga BE, por përpara zgjedhjeve për Parlamentin Evropian ai ka zbutur tonin dhe ka hequr dorë nga objektivi për të organizuar një referendum për anëtarësimin në Union. Ai ka njoftuar se objektivi i PVV-së tani është kufizimi i pushteteve të BE-së nga brenda PE-së, ndoshta në aleancë me partitë e djathta të Italisë dhe Francës, të drejtuara nga kryeministrja Giorgia Meloni dhe Marine Le Pen, respektivisht.
