Deputetët e Rithemelimit s’heqin dorë nga kaosi në Kuvend; i bashkohen protestës jashtë! 

Skenari i kaosit që vijon prej muajsh nga deputetët e grupit Bardhi dhe Berisha nuk lejoi as sot mbajtjen e një seance normale në Kuvend. Tensioni filloi në hyrje të Kuvendit ku garda kishte mbyllur dyert për të mos lejuar deputetët e përjashtuar të hyjnë brenda duke lënë jashtë pjesën më të madhe të deputetëve të tjerë të opozitës.

Pas shtyrjeve dhe përplasjeve deputetët Gazment Bardhi, Asllan Dogjani dhe Flamur Noka të shoqëruar nga disa prej deputetëve të përjashtuar arritën të hyjnë brenda ku dhe vijuan skenarin e kaosit.

U përpoqën të ndalonin deputetët e maxhorancës por garda e bërë gardh nuk i lejoi. Ndërkohë deputeti Asllan Dogjani hodhi fletoren e rregullores drejt kryeministrit Rama dhe ministrave.

Grupi Bardhi-Berisha vijon bllokimin e Kuvendit, gazetari Kikia: Kjo axhendë s’u ka sjellë asnjë ndryshim! Palët në luftë se kush do zërë vendin e dytë

“Turp! Turp! Thërrisnin ata

‘Turp tju vijë juve që pengoni fjalën e kolegëve’ u tha Nikolla.

Pas seancës që zgjati vetëm 15 minuta kreu i grupit PS paralajmëroi se do të ketë përjashtime të tjera për këdo që pengon zhvillimin normal të seancës, ndërsa Bardhi tha se Garda e Republikës veproi me me urdhër të Edi Ramës.

Ndërkohë një grup protestuesish ishin mbledhur para kuvendit. Report Tv solli pamje me dron ku pjesëmarrja duket e ulët. Disa deputetë të Rithemelimit mbajtën fjalimin para protestuesve. Më pas protestuesit dhe deputetët bashkë dhe me Bardhin shkuan tek rrugica e Berishës.

Kaosi në Kuvendi, Çuçi paralajmëron deputetët e opozitës: Do të ketë sërish përjashtime

Kryetari i grupit parlamentar në Partinë Socialiste Bledi Çuçi ka paralajmëruar se do të ketë sërish përjashtime për deputetët të cilët kanë thyer rregullat dhe krijuar kaos e tensione në Kuvend. Çuçi tha se askush nga deputetët e papërjashtuar nuk është ndaluar që të futet në Kuvend.

‘Ishte shfaqje e shëmtuar. Besoj e kemi pasur të qartë para rregullit dhe zhvillimit normal të parlamentit nuk do të na ndalë asgjë. Përjashtimet do të vijojnë nëse do të kemi sërish tensione në parlament apo në komisione.

Askush nga deputetët e papërjashtuar nuk do të ndalohet nuk është ndaluar asnjëherë. Nuk është ndaluar as sot. Nuk e ndoqa pasi unë isha brenda. Askush nuk e ka ndaluar një njeri që nuk ka qenë i përjashtuar në seancë. Ky teatër merr kolegët e përjashtuar të futen me zor është teatër absurd.’- tha Çuçi.

Bardhi: U shqyem nga xhaketa për t’u futur në Parlament, kjo është e paimagjinueshme! Do t’i bashkohem çdo proteste

Pas përfundimit të seancës plenare për shkak të kaosit të krijuar nga opozita, deputeti Gazment Bardhi tha se Garda e Republikës me urdhër të Edi Ramës po tenton që të lërë deputetët jashtë Kuvendit.

Bardhi tha se është e paimagjinueshme si deputetët e opozitës të shqyhen nga këmisha dhe kostumi.

Bardhi po ashtu pohoi se do të bëhet pjesë e protestës së thirrur nga Rithemelimi.

‘Sot në Kuvend kishte ardhur bashkëpunëtori i Arben Ahmetajt. Me një urdhër të paligjshëm deputetët e opozitës u penguan të futen në sallën e seancës plenare. Garda e Republikës me urdhër personal të Ramës tentoi të lërë jashtë deputetët e opozitës. Vetëm në vende me regjime autoritare ndodh që deputetët e opozitës nuk lejohen që të futen në Kuvend.

Është e paimagjinueshme për një vend anëtar të NATO-s që deputetët duhet të shqyhen nga këmisha dhe kostumi që të futen në sallat e seancës plenare. As garda e republikës as policia që dhunon qytetarët nuk e ndal opozitën nga përballja me regjimin e Edi Ramës. Do ti bashkohem çdo lloj proteste kundër Edi Ramës.’- tha Bardhi.

Bardhi vjen nga Amerika dhe bashkon ‘forcat’ me Nokën, futen me vrull në Kuvend, flakin tutje xhaketat e kërcënojnë Ramën

Pas kthimit nga Amerika, Gazment Bardhi i është bashkuar Flamur Nokës në aksionin opozitar të Foltores. Pasi kanë çarë kordonin e gardës duke u futur në Kuvend me dhunë, me të hyrë në sallë i janë drejtuar duke bërtitur kryeministrit dhe ministrave. Siç shihet në video Gazment Bardhi i pari, i ndjekur më pas Flamur Noka e Asllan Dogjani kanë hequr xhaketat, duke i flakur tutje në Kuvend ndërsa me vrull të madh drejtohen nga kryeministri. Siç dëgjohet në video nga ana e deputetëve është përdorur fjalor fyes ndaj kreut të qeverisë.

Bardhi, Dogjani dhe Noka çajnë kordonin e Gardës, futen me dhunë në sallën e parlamentit! Nikolla: Turp t’u vijë

Deputetët Gazment Bardhi, Asllan Dogjani dhe Flamur Noka të shoqëruar nga disa prej deputetëve të përjashtuar kanë çarë kordonin e gardës në hyrje të parlamentit duke u futur në seancë plenare me dhunë. Mes kaosit të Rithemelimit, kryeparlamentarja e Kuvendit Lindita Nikolla është detyruar që të mbyllë seancën për rreth 15 minuta. “T’u vijë turp”, u tha Nikolla.

Të përjashtuarit bllokuan derën e Kuvendit, pjesa më e madhe e deputetëve të opozitës mbeten jashtë

Ndërkohë që deputetët e Rithemelimit të përjashtuar nga seancat plenare kanë bllokuar derën e parlamentit duke u përplasur me gardën, kanë mbetur jashtë pjesa më e madhe e deputetëve të tjerë të opozitës.

Tentojnë të futen me dhunë në Kuvend, deputetët e përjashtuar të Rithemelimit mbajnë ‘peng’ dhe Fatmir Mediun! Ish deputeti telefonon Nikollën: Hape derën

Deputetët e Rithemelimit që janë përjashtuar nga seanca plenare, kërkojnë të futen me dhunë në sallën e Kuvendit. Duke qenë se kanë bllokuar hyrjen për në Kuvend, kanë lënë jashtë edhe Fatmir Mediun i cili siç shihet në foto ka mbetur i bllokuar mes të përjashtuarve. I mbetur jashtë seancës, Mediu ka marrë në telefon Lindita Nikollën duke i kërkuar të hapin derën e parlamentit.

“O kryetare hapni derën, nuk jemi të përjashtuar ne”, i ka thënë Mediu.

Deputetë e opozitës tentojnë të futen në Kuvend, s’i lejon garda! Dogjani përplaset fizikisht me efektivin

Deputetët e grupimit të Sali Berishës dhe ato të Gazment Bardhit po tentojnë që të futen në ambientet e brendshme të Kuvendit.

Megjithëse rezultojnë të përjashtuar, deputetët e opozitës, kanë tentuar që të futen brenda, ndërsa nuk janë lejuar nga garda e cila është bërë ‘gardh’ para derës së Kuvendit.

‘Nuk është kapanon ky! Nuk mund të bllokosh deputetët të futen në parlament’- tha Ervin Salianji.

Ndërkohë deputeti Asllan Dogjani është përplasur me një nga punonjësit e Gardës.

Deputetët e përjashtuar janë : Ervin Salianji, Albana Vokshi, Sorina Koti, Elda Hoti, Lindita Metaliaj, Isuf Çela, Tritan Shehu, Lefter Gështenja, Helidon Bushati, Xhelal Mziu, Edmon Spaho, Oerd Bylykbashi, Saimir Korreshi, Kasëm Mahmutaj, Ramadan Likaj, Kastriot Piroli, Qani Xhafa, Lodovik Hasani, Luan Baçi.