“BQK nuk merr udhëzime nga Qeveria” | BQK shkeli ligjin duke zbatuar urdhrin politik të Kurtit (Dokument)

Ky përkufizim i Ligjit për Bankën Qendrore të Kosovës (03/L-209) është shkelur me të dy këmbët nga Banka Qendrore e Kosovës, e cila pas urdhërit publik të kryeministrit të Kosovës, Albin Kurti, ka ndërmarrë veprime konkrete, shkruan Demokracia.com.

Kushtetuta e Kosovës e ka përcaktuar Bankën Qendrore si “institucion të pavarur, i cili i përgjigjet vetëm Kuvendit të Kosovës”, kurse Ligji për Bankën Qendrore ia ndalon anëtarëve të organeve vendimmarrëse ose personelit të saj që të marrin udhëzime “nga ndonjë person apo subjekt tjetër, duke përfshirë subjektet qeveritare”.

Por, këto kufizime të Kushtetutës dhe të Ligjit për BQK-në nuk janë marrë parasysh as nga kryeministri Kurti dhe as nga drejtuesit e BQK-së, të cilët në një kohë rekord i janë përgjigjur pozitivisht urdhërit të dhënë publik nga shefi i Qeverisë së Kosovës.

11:37 – URDHRI PUBLIK I KURTIT PËR BQK-në

Pas përdorimit të temës së nxitur nga BQK-ja me ndryshimin e rregullores që kufizon përdorimin e valutave të huaja, përfshirë dinarin serb, kryeministri Kurti, i ndodhur nën presion të madh ndërkombëtar ka vendosur që të shkelë pavarësinë kushtetuese dhe ligjore të këtij institucioni themelor në Republikën e Kosovës, por që tashmë është kapur nga militantë të Vetëvendosjes.

Të hënën e 12 shkurtit 2024, në orën 11:37, Kurti, ndonëse nuk e përmendi me emër, urdhëroi BQK-në që të mos zbatojë masa ndëshkuese gjatë një periudhe tranzicioni.

“Qeveria e Kosovës, në kuadër të kompetencave të saj, nuk do të zbatojë asnjë masë ndëshkuese gjatë periudhës së tranzicionit dhe u bën thirrje shtyllave të tjera që të mbajnë të njëjtin qëndrim me përkushtim”, shkroi ai.

15:25 – BQK BIE NËN NDIKIMIN E KURTIT DHE ZBATON URDHRIN E TIJ

Në një kohë rekord pas këtij urdhri publik, Banka Qendrore ka hartuar planin me veprime shtesë, të cilin e publikuan në ditën e njëjtë, në orën 15:25.

Ky plan me veprime shtesë, sipas BQK-së, do të realizohet “në një afat sa më të shkurtër, por jo më gjatë se tre (3) muaj, në bashkëpunim edhe me bankat dhe institucionet tjera financiare”.

Pavarësisht kontekstit politik, me anë të këtij veprimi, drejtuesit e BQK-së vepruan në shkelje të nenit 6 të Ligjit për Bankën Qendrore, duke i dhënë fund pavarësisë së institucionit që drejtojnë pas urdhërit politik të kryeministrit të Qeverisë së Kosovës dhe duke treguar publikisht se qëndrimet e tyre nuk ishin të pavarura, por të ndikuara politikisht. /Demokracia.com/