Në prag të zgjedhjeve presidenciale të martën në SHBA, kryeqyteti federal Uashington po përgatitet me barriera sigurie, dërrasa mbrojtëse në dritaret e dyqaneve dhe një prani të shtuar të policisë, për të shmangur dhunën, duke marrë parasysh ngjarjet që ndodhën në qytet katër vite më parë, shkruan AFP të shtunën.
Autoritetet e kryeqytetit federal të SHBA-ve kanë paralajmëruar se në ditët dhe javët në vijim pas mbylljes së qendrave të votimit pritet një “mjedis sigurie i ndryshueshëm dhe i paparashikueshëm”, duke shtuar se nuk presin që fituesi të shpallet menjëherë pas zgjedhjeve.
Kujtimi i datës 6 janar 2021 ende rëndon mbi qytetin: në atë ditë, qindra mbështetës të kandidatit aktual republikan për president të SHBA, Donald Trump, sulmuan Kapitolin, tempullin e demokracisë amerikane, për të tentuar të ndalonin certifikimin e fitores së Joe Biden në zgjedhjet e vitit 2020.
“Në shumë aspekte, përgatitjet tona për vitin 2024 filluan më 7 janar 2021”, tha Christopher Rodriguez, një zyrtar i qytetit, gjatë një seance të këshillit të qytetit që u mbajt javën e kaluar.
Para sulmit ndaj Kapitolit, Uashingtoni ishte tronditur nga demonstratat e dhunshme gjatë lëvizjes antiraciste Black Lives Matter në verën e vitit 2020.
Duke kandiduar për herë të tretë në zgjedhjet presidenciale, Donald Trump ka refuzuar të angazhohet për të pranuar rezultatet e zgjedhjeve dhe tashmë parashikon – pa prova – ekzistencën e mashtrimit elektoral dhe vjedhjes në shtete kyçe si Pennsylvania.
Dezinformimi –
Të premten, vetëm pak hapa larg Shtëpisë së Bardhë, punëtorët vendosnin dërrasa druri për t’i fiksuar në dritaret e disa dyqaneve.
Prej disa javësh, një barrierë sigurie ka ndërprerë në masë të madhe edhe hyrjen në një nga sheshet përballë rezidencës presidenciale.
U ngritën barikada, ndërsa punëtorët punonin në temperatura të pazakonta të ngrohta. Ata po ndërtojnë një nga platforma që do të përdoret për ceremonitë e inaugurimit të presidentit të ri në janar.
Në mënyrë tradicionale, punimet fillojnë në nëntor, por më 6 janar 2021, punëtorët u detyruan të evakuojnë kantierin.
Këtë vit, Shërbimi i Parkeve Kombëtare ka njoftuar se punimet do të fillojnë një muaj më herët “për të pasur kohën shtesë të nevojshme për një mjedis më të sigurt”.
Demonstrim i forcës –
Policia federale, FBI, ka njoftuar se do të krijojë një qendër komanduese për të monitoruar kërcënimet, ndërsa Shërbimi Sekret, përgjegjës për mbrojtjen e personaliteteve të larta politike, ka deklaruar se do të forcojë sistemin e sigurisë nëse është e nevojshme.
Policia e Kapitolit, që pati shumë oficerë të plagosur gjatë ngjarjeve të 6 janarit 2021, ka refuzuar të komentojë se si po përgatitet. Kryebashkiakja Muriel Bowser tha gjatë një konference për shtyp në tetor se ky departament policie i dedikuar sigurisë së Kongresit do të jetë “i përgatitur”.
Nuk është identifikuar asnjë “kërcënim i besueshëm” që synon Uashingtonin në periudhën përreth zgjedhjeve, ka siguruar shefja e policisë së qytetit, Pamela Smith.
Ajo ka premtuar një demonstrim të forcës “të dukshme” në qytet javët në vijim, me një kulm prej 4,000 përforcimesh më 20 janar, ditën e inaugurimit presidencial.
