Të hënën u hapën aplikimet për vendosjen e paneleve për ngrohjen e ujit. Nga kjo masë mbështetëse, përfitojnë 2 mijë abonentë familjarë, me të cilën shteti do të subvencionojë 70% të vlerës së investimit.
Ani Hasa, drejtor i Agjencisë së Eficencës së Energjisë, tha për “Money Report” se deri më tani kanë aplikuar 1300 abonentë. Ai shtoi se fituesit e fazës së parë, nuk mund të aplikojnë më.
“Një nismë e shkëlqyer e qeverisë dhe ministrisë së Infrastrukturës dhe Energjisë. Kriteret janë të thjeshta. Duhet një letër njoftim, certifikatë pronësie, foto të ambientit ku do vendoset paneli, vërtetim debie nga OSHEE nëse ka fatura të prapambetura dhe faturat për vitin e fundit në një mesatare mbi 400 kilovat. Deri më tani janë bërë 1300 aplikime në 36 orë.”, u shpreh Hasa.
Sa pritet të reduktohet fatura e energjisë?
“Kemi marrë një feedback të mirë nga thirrja e parë dhe shkon deri në 30 përqind në disa raste, edhe kur konsumi i energjisë është më i madh. Sipas organizatave ndërkombëtare, kursimi i energjisë me panel diellor shkon nga 15-25 përqind.“, u shpreh Hasa.
Më tej, Hasa u ndal edhe tek një tjetër projekt.
“Kemi rihapur një thirrje për vendosjen e kullave të karikimit në zonat turistike ose në zonat doganore. Projekti është drejt përfundimit që të jetë funksionale për qytetarët dhe të kapim periudhën e verës”, shtoi ai./abcnews.al
