Sonda hapësinore Parker, e zhvilluar nga agjencia hapësinore amerikane NASA, kaloi të martën, në prag të Krishtlindjeve, më afër se kurrë me Diellin, për të studiuar atmosferën e saj, raporton AFP.
E nisur në gusht 2018 në një mision shtatëvjeçar, sonda Parker synon të thellojë njohuritë shkencore rreth yllit tonë, veçanërisht për të zbuluar misterin e stuhive diellore, të cilat mund të ndikojnë në komunikimet tokësore.
Sonda do të fluturonte pranë Diellit të martën në orën 11:53 GMT, në një distancë prej 6.2 milionë kilometrash nga sipërfaqja e yllit, një afrim rekord.
Megjithatë, ekipi i misionit duhet të presë deri të premten për të marrë një sinjal nga sonda, pasi shkencëtarët humbasin kontaktin e drejtpërdrejtë me të për disa ditë për shkak të afrimit të tij me Diellin, i quajtur perihelion.
“Ky është një shembull i misioneve të guximshme të NASA-s, duke bërë diçka që askush nuk e ka bërë më parë për t’iu përgjigjur pyetjeve të vjetra në lidhje me Universin tonë,” tha në një deklaratë shkencëtari i sondës diellore Parker, Arik Posner.
“Ne mezi presim të marrim përditësimin e parë nga anija kozmike dhe të fillojmë marrjen e të dhënave shkencore në javët e ardhshme”, shtoi ai.
Gjatë afrimit të saj me Diellin, sonda Parker udhëtoi me një shpejtësi marramendëse prej rreth 690,000 km/h – e mjaftueshme për të kaluar distancën midis Uashingtonit dhe Tokios në më pak se një minutë.
Mburoja e nxehtësisë së sondës duroi temperatura ekstreme prej rreth 870 deri në 930 gradë Celsius, por instrumentet e saj të brendshme mbetën afër temperaturës së ambientit – rreth 29 gradë Celsius – ndërsa eksploronte shtresën e jashtme të atmosferës së Diellit, e njohur si emri korona diellore.
Një nga objektivat e misionit të sondës Parker, i cili u fut në kushte kaq ekstreme, është të kuptojë pse kjo zonë është, çuditërisht, 200 herë më e nxehtë se sipërfaqja e Diellit.
Afrimi i Diellit në natën e Krishtlindjeve është i pari nga tre fluturimet rekord të planifikuara, me dy të tjerat – më 22 mars 2025 dhe 19 qershor 2025 – duke e sjellë sontën Parker përsëri pranë Diellit në një distancë të ngjashme.
