Ferizaj ka marrë një fitore të madhe ndaj Gjilanit me rezultat 3-1 në ndeshjen e vlefshme për javën e 18-të në Albi Mall Superligën e Kosovës.
Ekipi i Arsim Abazit i është kthyer fitores në kampionat pas shtatë ndeshjeve duke e mbyllur kështu sezonin vjeshtor në pozitën e barazhit.
Pjesa e parë e ndeshjes u karakterizua me lojë më të mirë të vendasve, të cilët arritën të shënojnë edhe dy gola, për dallim të një goli nga mysafirët.
Goli i parë i ndeshjes erdhi pas vetëm pesë minutave lojë me anë të Marko Musulin, i cili shënoi për epërsinë 1-0.
Gjilani arriti të kthehet në lojë në minutën e 37-të duke barazuar 1-1 me anë të Edi Basa që shënoi nga penalltia, por Enhar Cakolli (39’) dërgoi skuadrën e tij në pushim me epërsi 2-1.
Në pjesën e dytë u zhvillua lojë më e barabartë, por përsëri ishin vetëm vendasit që gjeten golin dhe siguruan fitoren.
Goli i vetëm në këtë pjesë erdhi në minutën e 77-të me anë të Erion Sadriut, i cili shënoi për 3-1 dhe ky doli të ishte rezultati përfundimtar i ndeshjes.
Pas kësaj fitore, Ferizaj e mbyll sezonin vjeshtor në pozitën e tetë me 20 pikë, ndërsa Gjilani renditet i gjashti me 21 pikë
