Qefsere Ajeti, ushtruesja e detyrës së Sekretarit të Përgjithshëm në Ministrinë e Tregtisë, është avancuar në detyrë disa javë pas emërimit në pozitën e u.d. të sekretares.
Ajeti është avanuar në pozitën “udhëheqës i divizionit për promovim dhe avokim”, në një proces rekrutimi të cilin e ka hapur vet.
Procedura është udhëhequr nga Njësia për Menaxhimin e Burimeve Njerëzore, raporton Paparaci.
Shkresat zyrtare tregojnë se u.d sekretarja e Ministrisë së Industrisë, Ndërmarrësisë dhe Tregtisë është përzgjedhur kandidatja më e suksesshme në procesin rekrutues, bazuar në pikët e dhëna nga komisioni vlerësues në procedurë.
“Në bazë të Ligjit nj.08/L-197 për Zyrtarët Publikë, neni 11 i rregullores nr15/2023 për Procedurën e Pranimit në Shrbimin Civil, Ministria e Industrisë, Ndërmarrësisë dhe Tregtisë publikon njoftimin e shpalljes së rezultatit përfundimtar për kandidatin fitues nga Komisioni i Vlerësimit për pozitën Udhëheqës i Divizionit për Promovim dhe Avokim: Qefser Ajeti”, thuhet në njoftimin për kandidatin fitues.
Ky njoftim është nxjerrë më 23 dhjetor të vitit të kaluar, rreth një muaj pas vendimit të ministres Rozeta Hajdari për caktimin e Ajetit në pozitën e u.d. të sekretares.
Brenda gati katër vitesh, në Ministrinë e Industrisë, Ndërmarrësisë dhe Tregtisë të udhëhequr nga Rozeta Hajdari, janë ndërruar shtatë sekretar, të gjithë të emëruar si ushtrues të detyrës.
Gjatë mandatit gati katër vjeçar të ministres Hajdari, ajo ka emëruar dhe shkarkuar nga pozita e u.d. sekretarit Gentiana Islamajn, Irfan Lipovicën, Arbër Gegajn, Rexhep Bllacën, Daut Latifajn dhe Sebahate Bushranin.
