Katër njerëz gjetën vdekjen pasi një helikopter goditi një “kullë radioje” në Hjuston të dielën mbrëma dhe shkaktoi një zjarr të madh, thanë autoritetet.

Autoritetet policore kanë thënë në një konferencë shtypi se katër persona ishin në bord, duke përfshirë një fëmijë, dhe se “pati vdekje të shumta” kur u rrëzua helikopteri privat.

Departamenti i Zjarrfikësve të Houston fillimisht raportoi se përplasja ndodhi në lagjen Second Ward të qytetit, ku helikopteri dukej se kishte goditur një kullë radioje përpara se të shkaktonte një zjarr rreth orës 19:54, sipas kohës lokale. 

Në konferencën për shtyp, zyrtarët e zjarrfikësve thanë se zjarri u përhap deri në tre blloqe përpara se të ndalohej.

Bizneset në zonë ishin mbyllur në atë kohë.

Sipas autoriteteve, nuk dukej se dikush në tokë ishte lënduar.

Identiteti i personave në bord nuk është bërë i ditur ndërkohë që zyrtarët thanë se Bordi Kombëtar i Sigurisë së Transportit dhe Administrata Federale e Aviacionit do të hetojnë ngjarjen.