Pas takimit me Ursula von der Leyen, liderët e Ballkanit Perëndimor do të mblidhen edhe për një drekë pune.
Kësaj radhe, nikoqir i drekës është shefi i politikës së jashtme dhe sigurisë së BE-së, Josep Borrell.
Borrell do t’i mbledhë liderët e BP-së të mërkurën në New York, raporton Indeksonline.
Takimin e ka konfirmuar edhe Komisioni Evropian.
Përmes një njoftimi zyrtar, KE-ja bëri të ditur se mbledhja në fjalë do të jetë në kuadër të aktiviteteve gjatë sesionit të 79-të të Asamblesë së Përgjithshme të Kombeve të Bashkuara.
Sesioni i OKB-së në New York, sipas njoftimit të KE-së, do të ndiqet nga një delegacion i nivelit të lartë të BE-së.
Në qendër të vëmendjes në këtë takim do të jetë tema për trajtimin e konflikteve dhe krizave në të gjithë botën.
