Elisa Spiropali u emërua këtë të martë si kryetare e Parlamentit me 75 vota pro.
“Jam e prekur si asnjëherë më shumë në jetën time të shkurtër apo të gjatë publike, varet nga këndvështrimi. Faleminderit me zemër! E dimë mirë që ky është ushtrim jashtëzakonisht i vështirë politik, social, sa personal aq edhe kolektiv, por jam e qartë. Çfarë shkon mirë është e juaja, çfarë shkon keq është e kujtdo që e ngjisni këtu lart. Megjithatë kjo më motivon”, tha ajo në fjalën e saj pasi mori detyrën,
Seanca që ishte parashikuar për të votuar Spiropalin dhe ministrat e rinj të qeverisë Rama u shoqërua me tensione.
Deputetët opozitarë bllokuan foltoren duke e bërë të pamundur që të bëhej votimi i fshehtë për Spiropalin. Edhe për këtë çështje, socialistët kishin marrë masa duke iu drejtuar votimit të fshehtë në mënyrë elektronike.
Madje pas votimit, disa deputetë kanë hedhur ujë dhe letra në drejtim të kryeministrit Edi Rama. Ndërkohë me herët u miratuan edhe ministrat e rinj të qeverisë Rama (Lexo më shumë)./tvklan.al
