Hovenier reagon pas takimit të Gjuriqit me kryeterroristin serb: Radojçiq, kriminel që duhet mbajtur përgjegjës për Banjskën

Millan Radojçiq, lideri i grupit famëkeq paraushtarak që sulmoi në Banjskë të Zveçanit “është kriminel që duhet të mbajë përgegjësi”, ka thënë ambasadori amerikan në Prishtinë, Jeffrey Hovenier, duke komentuar takimin e fundit që u bë publik mes Radojçiq dhe ish- ambasadorit serb në Uashington, Marko Gjuriq.

Në një përgjigje për gazetën Express, Hovenier pyetur rreth këtij takimi Gjuriq-Radojçiq, veçse ka përsëritur qëndrimin amerikan rreth Radojçiqit i cili qysh para mëse dy viteve ishte futur nën sanksione nga Thesari amerikan i Shtetit.

“Siç kanë thënë zyrtarë të lartë të qeverisë amerikane: Serbia duhet të mbajë përgjegjës ata të përfshirë në sulmin e kryer nga paraushtarakët etnikë serbë në Banjska që rezultoi në vdekjen tragjike të një rreshteri të Policisë së Kosovës”, ka thënë Hovenier.

Plagosja e tre personave në një lokal, spitali i Gjakovës jep detaje: Gjendja e tyre stabile, një nga ta është…
“Ai ka marrë përgjegjësinë për sulmin në Banjska përmes avokatëve të tij. Ai është një kriminel që duhet të mbajë përgjegjësi”.

“Qëndrimi i Shteteve të Bashkuara për zotin Radoicic është i njohur. Z. Radoicic është nën sanksionet e qeverisë amerikane për përfshirje në korrupsion dhe krim të organizuar transnacional”, ka thënë Hovenier mes tjerash.

Marko Gjuriq po përflitet si mandatar për formimin e qeverisë së re të Serbisë pas zgjedhjeve atje.

Radoiçiq i cili e ka pranuar se ka qenë në krye të sulmuesve në Banjskë, ishte ndaluar nga policia serbe më 24 shtator të vitit të kaluar, por pas pak ditëve Gjykata e Lartë në Beograd kishte njoftuar se e ka liruar nga mbajtja një ditë pas marrjes në pyetje. Që nga atëherë, Radoiçiq është i lirë në Serbi. Në reagimin e tij për takimin, Gjuriq ka thënë se as nuk e fsheh e as nuk turpërohet dhe se lidhet me “punën që e bën”.

Gjuriq ka thënë po ashtu se publikimi i fotografisë lidhet me kthimin e tij në politikë të përditshme.