Protesta e Rithemelimit përshkallëzoi pas fjalimit ‘virtual’ të Berishës

Protesta e Rithemelimit përshkallëzoi pas fjalimit ‘virtual’ të Berishës, pasi militantët hodhën molotov drejt shkallëve të kryeministrisë dhe gurë ndaj forcave të policisë. Por pas shfaqjes së forcave ‘Shqiponja’ situata u qetësuam ndërsa udhëheqësit e turmës u larguan duke e mbyllur protestën pas dy orësh.

Protestuesit sa vijnë e braktisin Sali Berishën, i cili nuk mund të dalë nga shtëpia pasi po hetohet për korrupsion lidhur me privatizimin e ish kompleksit Partizani.

Përtej fasadës së fotove, pamjet me dron që sjell Report Tv nxjerrin zbuluar braktisjen që populli i ka bërë Berishës dhe Rithemelimit edhe në protestën e thirrur sot pasdite para kryeministrisë. Militantët janë shpërndarë nëpër bulevard për tu dukur shumë. Protestës i janë bashkuar fëmijët e Berishës ‘të shpallur non grata’ edhe nga SHBA e Mbretëria e Bashkuar, Argita Malltezi dhe Shkëlzen Berisha.

Nga podiumi Luçiano Boçi tha se po kërkohet ‘të burgosin Sali Berishën por ne nuk dorëzohemi’

Protestës i mungon kreu i Partisë së Lirisë, Ilir Meta apo bashkëshortja e tij, deputete Monika Kyemadhi pasi ndodhen në Egjipt për arsye personalem ndërsa u bojkotua nga PDIU e LZHK. As PD e Bashës nuk është pjesë e kauzës së kësaj proteste.

Ndërkohë i janë bashkuar protestës, Fatmir Mediu, Agron Duka, Isuf Çela, si dhe Luçiano Boçi, Belind Këlliçi. Protestuesit po marshojnë në bulevardin “Dëshmorët e Kombit’ për tu ndalur para kryeministrisë. Protestuesve Berisha pritet ti drejtohet me një videomesazh.

Rendit zhvillimet sipas orarit:

Ora 20:24
Protesta e Rithemelimit/ ‘Skenë krimi’ para kryeministrisë, hetuesit mbledhin provat e militantëve të Berishës, mbërrin edhe Balla
Policia e Shtetit dhe hetuesit kanë shkuar para kryeministrisë ku po mbledhin provat që lanë militantët e Berishës të cilët në fund të protestës së Rithemelimit kanë hedhur koktej molotovi në drejtim të godinës, mbi kokat e policëve të bërë gardh përballë tyre. Përpara kryeministrisë ka shkuar edhe ministri i Brendshëm Taulant Balla.

Ora 20:04
Protesta e Rithemelimit, Bardhi thumbon Bashën: S’ka më dyshim kush përfaqëson PD-në! Gjykata të na japë vulën e partisë

Pas mbylljes së protestës së Rithemelimit përballë kryeministrisë, deputeti Gazment Bardhi nga selia e vjetër e PD-së, tha se tashmë nuk kam ë dyshim se cili grupim përfaqëson Partinë Demokratike. Ndërsa i bëri thirrje gjykatës që të mos zvarrisë më çështjen e vulës së PD-së.“Ka dyshim më kush se ku është PD, kush i gëzon simbolet e PD? Dhe gjej rastin t’i bëj thirrje së pari gjykatës së Lartë të zbardhë vendimin dhe të mos zvarrisë më tej çështjen dhe gjykatës së Apelit që të japë vendimin për vulën e PD. Turi ynë me qytetarët do të vijojë edhe në mënyrë më intensive me ekip më të gjerë. Tashmë do kemi një agjendë edhe më të koordinuar”- tha Bardhi për mediat.

Ora 19:35

Militantët e Rithemelimit rrëzojnë gardhin metalik para kryeministrisë, shkulin lulet dhe i hedhin drejt policëve

Ky është momenti kur militantët që i janë bashkuar protestës së Rithemelimit kanë rrëzuar gardhin e hekurit para kryeministrisë. Ata shihen teksa shkulin lulet dhe i kanë hedhur drejt policëve.

Ora 19:28
Përshkallëzon protesta e Rithemelimit, hidhet molotov në shkallët e kryeministrisë! Militantët tentojnë të thyejnë kordonin e policisë

Protesta e Rithemelimit përballë kryeministrisë është përshkallëzuar. Protestuesit kanë hedhur molotov kapsolla në shkallët e godinës së kryeministrisë. Ndërsa disa prej militantëve me flamur të PD në duar kanë tentuar të kalojnë kordonin e vendosur nga policia.

Ora 19:18
Berisha mesazh me podium nga shtëpia para protestuesve, e ndjekin pak më shumë militantë se kur flet nga ballkoni

Sali Berisha, nga masa e sigurisë “arrest shtëpie” ka mbajtur fjalim online para protestuesve të mbledhur nga Rithemelimi përpara kryeministrisë. Siç shihet në video në momentin që në protestë flet Berisha i cili ka organizuar një podium nga shtëpia, pjesëmarrja e njerëzve është pak më shumë se kur flet nga maja e ballkonit të shtëpisë.

Ora 18:25
Populli braktis Berishën, në protestë dalin Argita dhe Shkëlzeni

Ndërkohë që duket se populli ka braktisur thirrjet e Rithemelimit për protestë, duke bërë që të pranishëm të jenë më së shumti militantë që thërrasin emrin e Berishës, në sheshin para godinës së qeverisë kanë dalë edhe fëmijët e ish-kryeministrit Sali Berisha, Shkëlzeni dhe Argita Malltezi. Nga thirrjet e deritanishme nga folësit në podium, vëmendja ka qenë më së shumti tek lirimi i Berishës i cili ndodhet në ‘arrest shtëpie’ dhe jo tek shqetësimet e qytetarëve. 1708450185_berisha.jpg

Ora 18:22
Tabaku e pranishme në protestën e thirrur nga Rithemelimi, pranë saj edhe ish-kreu i grupit parlamentar të PD, Alfred Rushaj

Deputetja e Partisë Demokratike, Jorida Tabaku pavarësisht se më herët ka refuzuar të jetë pjesë e bashkimit mes Rithemelimit dhe deputetëve të grupit të Gazment Bardhit, ka zgjedhur të jetë e pranishme në protestën e mbrëmjes së sotme.Në foton e siguruar nga Report Tv, Tabaku shihet pranë Alfred Rushajt, ish kreut të grupit parlamentar të PD-së.

Ora 18:18
Protesta e Rithemelimit, kush janë aleatët që e kanë bojkotuar! Mungon edhe Meta e Kryemadhi
LZHK, PDIU kanë dalë kundër protestës së Rithemelimit. Asnjë përfaqësues i dy partive të vogla opozitare dikur aleat me Sali Berishën, nuk është i pranishëm në mesin e militantëve që janë grumbulluar para kryeministrisë. Ashtu si PD zyrtare, protestën e kanë bojkotuar edhe Ilir Meta e Monika Kryemadhi të cilët në emër të Partisë së Lirisë kanë çuar përfaqësues Petrit Vasilin dhe Endrit Braimllarin.

Ora 18:12
Luçiano Boçi u bën thirrje protestuesve: Na takon neve t’i shembim dyert e kryeministrisë

Nënkryetari i Rithemelimit, Luçiano Boçi gjatë fjalës së tij në protestën para kryeministrisë bëri thirrje për dhunë, revoltë dhe shembjen e dyerve të godinës së qeverisë.Pavarësisht se u deklarua se protesta është organizuar për shqetësimet e qytetarëve Boçi sërish u fokusua në ‘arrestin shtëpiak’ të Sali Berishës duke e quajtur si ‘të burgosur të regjimit’.“Këto godina janë vende ku grabiten pasuritë tuaja, ku bëhen pazare të pista të qeverisë. Në këto godina është vrarë e ardhmja dhe është burgosur shpresa e shqiptarëve dhe po t’i shihni janë të lyera me krim dhe korrupsion. Të dashur miq, ai që është larguar shihni mirë se çfarë bën, këto godina i mbyll dhe na takon ne t’i shembim ato porta dhe t’i hapim ato dyer. Duke i hapur ato dyer i korruptuari kryeministër do të gjendet pas hekurave. Vetëm kështu e marrin në dorë njerëzit fatin e tyre në Shqipëri. Ndaj duhet të vazhdojmë betejën tonë të vështirë. U them atyre që mundohen të mbyllin këto porta, që duan të burgosin Sali Berishën, që ne nuk dorëzohemi dhe do vazhdojmë luftën tonë sepse jemi të frymëzuar nga njerëzit”- tha Boçi mes të tjerash.

Ora 17:59
Report Tv sjell pamje me dron të protestës së thirrur nga Rithemelimi, militantët të shpëndarë në bulevard për t’u dukur shumë

Report Tv sjell pamje me dron nga protesta e thirrur nga Rithemelimi përpara kryeministrisë.Vihet re një numër shumë i ulët pjesëmarrësish në këtë protestë të udhëhequr nga dyshja Bardhi-Noka në mungesë të Sali Berishës që ndodhet në arrest shtëpie.Militantët shihen të shpëndarë në bulevard për t’u dukur shumë.Lajmi në përditësim…

Ora 17:48
VIDEO/ Rithemelimi në protestë, dhjetra forca policie në gatishmëri para kryeministrisë, ka dhe të RENEA-s

Forcat e policisë kanë rrethuar kryeministrinë dhe janë në gadishmëri për të parandaluar çdo përshkallëzim situate. Para godinës është vendosur një gardh metalink që ndan protestuesit nga policia e cila edhe ajo është vendosur kordon para godinës së kryeministrisë.Në gatishmëri janë dhe forcat RENEA. Video nga LSA.Rruget e bllokuara
Disa segmente do të bllokohen 2 orë para nisjes së protestës deri në përfundim të saj: Bulevardi “Dëshmorët e Kombit”, sheshi “Nënë Tereza”, rruga “Ismail Qemali”, nga kryqëzimi i rrugës së Elbasanit me rrugën “Ibrahim Rugova”, rruga “Papa Gjon Pali II”, bulevardi “Zhan D’Ark” dhe bulevardi “Bajram Curri”, nga kryqëzimi i Rrugës së Elbasanit me rrugën “Ibrahim Rugova”.

Ora 17:11
Protesta e Rithemelimit, 20 minuta para nisjes, numër i ulët qytetarësh të pranishëm para kryeministrisë

Kur kanë mbetur më pak se 20 minuta nga nisja e protestës së Rithemelimit para kryeministrisë, Report Tv ka siguruar pamjet ku vihet re një numër i ulët qytetarësh që i janë përgjigjur thirrjes.Ndërkohë, policia ka marrë masat për mbarëvajtjen e protestës si dhe janë vendosur 2 kordona policorë para ndërtesës së qeverisë.Pavarësisht thirrjeve të Rithemelimit për protestën, duket se pritshmëritë e tyre për një numër të lartë qytetarësh në shesh, nuk do të përmbushen. /Shqiptarja.com/