Për Masakrën ku u vranë 106 shqiptarë, nga 13 ka mbetur veç një dëshmitar

Krasniqi pati dëshmuar në Tribunalin e Hagës për masakrën e Pastasellës. Me vdekjen e tij ka mbetur vetëm një dëshmitar i krimit të kryer nga forcat serbe në këtë fshat të Rahovecit më 1999, ku janë vrarë 106 meshkuj shqiptarë, të gjithë civilë. Prokuroria Speciale në Kosovë nuk ka ngritur asnjë aktakuzë lidhur me masakrën, për të cilën tash mund të dëshmojë vetëm një i mbijetuar
Ka vdekur të enjten Beqir Krasniqi, njëri nga 13 të mbijetuarit e Masakrës së 31 marsit të 1999-s në fshatin Pastasellë, gjatë së cilës forcat serbe kanë vrarë 106 meshkuj shqiptarë, që të gjithë civilë.

Krasniqi pati dëshmuar para Tribunalit Special të Hagës për krimet e luftës në ish-Jugosllavi në qershor të 2009-s, në procesin gjyqësor ndaj ish-zëvendësministrit të Punëve të Brendshme të Serbisë, Vlastimir Gjorgjeviq.

Në këtë proces, Gjorgjeviqi fillimisht është dënuar me 27 vjet burgim, porse Apeli më pas ia ka zbritur dënimin në 18 vjet heqje lirie. Krasniqi pati dëshmuar se si forcat serbe kanë zhvarrosur 106 kufomat për t’i zhdukur gjurmët e masakrës.

“Me të lindur dielli janë ardhur edhe i kanë nxjerrë 106 kufoma, krejt me bager i kanë hedhur në kamion”, ka deklaruar Beqiri në qershor të 2009-s.

Në përvjetorin e 24-t të masakrës së Pastasellës vitin e kaluar, KOHA pati raportuar se nga 13 të mbijetuarit e masakrës, vetëm dy ishin ende gjallë. Me vdekjen e Krasniqit, dëshmitar i vetëm i ngjarjes tragjike ka mbetur Tahir Limani.

Prokuroria Speciale në Kosovë nuk ka ngritur asnjë aktakuzë lidhur me këtë masakër. Në Tribunalin e Hagës, Gjorgjeviq është dënuar si përgjegjës për mijëra deportime dhe vrasje që kanë ndodhur në Kosovë midis muajve janar dhe qershor të vitit 1999, por jo konkretisht për masakrën e Pastasellës, fshat i Rahovecit.

13 burrat e mbijetuar nga masakra kanë lënë të shkruar dëshminë e tyre.

“Pastaj kanë filluar t’i marrin ata më të rinjtë, që i kishin masakruar për së gjalli. Këta i ndanë nga turma dhe i dërguan afër përroit, në distancë 50 metra. Aty i pushkatuan 30 persona, kështu filluan edhe me grupe të tjera. Pra, kishte 4 grupe, 119 persona. Prej tyre kanë shpëtuar 13 veta, të plagosur lehtë e rëndë”, thuhet në njërën nga dëshmitë e shkruara.

Familjes së Beqir Krasniqit, të enjten i janë shprehur ngushëllime të shumta nga udhëheqës institucionalë e partiakë.