Anëtaren e Bordit të OSHP-së e shkarkuan, por ekspertin e vendimit të “dëmshëm” për insulinat e shpërblyen me pozitën e sekretarit të OSHP-së

Para pak muajve, me propozim të kryeministrit Albin Kurti, Kuvendi i Kosovës e ka shkarkuar nga detyra e anëtares së Bordit të Organit Shqyrtues të Prokurimit, Kimete Berishën. Shkarkimi i saj erdhi për shkak, siç është thënë, të një vendimi të dëmshëm që mori lidhur me tenderin e insulinave. Por, një tjetër person, i cili ka qenë pjesë e atij vendimi është ngritur në detyrë së fundmi, shkruan Demokracia.com.

Tenderi i vlerës së madhe ‘Furnizim me insulina’, mbi dy vite ishte bllokuar në Organin Shqyrtues të Prokurimit (OSHP). Në fund, ky institucion kishte vendosur të rrëzojë përfundimisht vendimin e Ministrisë së Shëndetësisë për anulimin e tenderit. Paneli i OSHP-së kishte rekomanduar që furnizimi mund të bëhej nga kompani, që sipas ministrisë nuk e posedonte ‘Autorizim Marketingun’. Vendimin e OSHP-së, MSH-ja nuk e përfilli. Madje, vetë kryeministri i propozoi Qeverisë që të shkarkohet kryetarja e Bordit të OSHP-së, Kimete Berisha, e cila në këtë tender ishte kryetare e Panelit Shqyrtues.

Por, para se të merrte vendim Paneli lidhur me këtë tender e kishte autorizuar ekspertin e vet shqyrtues që të shoshis të gjitha provat. Eksperti Agim Sheqiri kishte vendosur që të rrezohet vendimi i MSH-së. Më pas Paneli Shqyrtues (Bordi) e kishte miratuar në plotni vendimin e ekspertit shqyrtues.

Demokracia.com ka gjetur se me propozim të Vjosa Gradinaj-Mexhuani, kryetar i Bordit të OSHP-së, Agim Sheqiri është emëruar si i pari i administratës në këtë institucion, konkretisht U.D i Kryesuesit të Sekretariatit të OSHP-së. Siç ka mësuar Demokracia.com, vendimi është marrë të premten nga Bordi.

Deri më tani, të gjithë kryesuesit e Sekretariatit me profesion kanë qenë juristë. Për herë të parë, në këtë pozitë është zgjedhur një person që shkollimin profesionale e ka nga bota e biznesit. Pra, dihet se OSHP-ja është kuazi i Gjykatës Administrative, ndërsa kryesuesi i sekretariatit është caktuar një ekonomist i diplomuar.

Lidhur me këtë, Demokracia.com ka dërguar pyetje edhe në OSHP, por ky institucion nuk është përgjigjur deri në publikimin e këtij artikulli.

Agim Sheqiri kishte prezantuar shumë shkelje që i kishte bërë Zyra e Prokurimit e Ministrisë së Shëndetësisë (MSH) për tenderin Furnizim me Insulina. Këto shkelje, ai pos në raportin e tij i kishte paraqitur në seancën dëgjimore të Organit Shqyrtues të OSHP-së ku ishte shqyrtuar ankesa e dy Operatorëve Ekonomikë (OE) që po kundërshtonin anulimin e këtij procesi prokurimi.

Zyra e Prokurimit e Ministrisë së Shëndetësisë (MSH), me çdo kusht tentonte të anulonte tenderin për furnizim me Insulina pas përpjekjeve të vazhdueshme që fitues të këtij tenderi ta shpall kompaninë “Meditech”, e cila në këtë proces prokurimi ka pasur çmim më të lartë prej rreth 400 mijë euro se sa kompania tjetër që ishte në garë për këtë proces prokurimi, “Pharma Leader”.

Agim Sheqiri kishte ardhur në përfundim që tenderi për insulina mund t’i jepet edhe një kompanie që nuk ka certifikatë të sigurisë, cilësisë e efikasitetit. Kjo ka qenë njëra nga katër çështjet për të cilat ai dhe MSH-ja kanë kundërshtime. Ministria e Shëndetësisë e ka akuzuar Sheqirin që ka lëshuar ekspertizë, edhe pse nuk e njeh fushën e barnave.

Sikurse herën e parë, edhe në ekspertizën dytë, Sheqiri konsideron që Ministria e Shëndetësisë nuk mund ta anulojë tenderin për blerjen e insulinave për mungesë të Autorizim Marketingut.

Derisa Ministria e Shëndetësisë nuk pranonte të hiqte dorë nga garantimi i cilësisë përmes Autorizim Marketingut, OSHP-ja nuk e ka parë këtë të domosdoshme. Më pas kishte ndërhyrë edhe Qeveria e Kosovës, duke propozuar shkarkimin e vetëm të kryetares së Panelit Shqyrtues, Kimete Berisha, jo edhe të tjerëve, ndonëse vota e saj ka qenë vetëm një, ndërsa vendimi është marrë me tri sosh. Berisha rastin e shkarkimit të saj e ka dërguar në Gjykatën Kushtetuese, ndërkohë që akoma nuk ka një vendim për rastin e saj.

Struktura organizative e OSHP-së

Organi Shqyrtues i Prokurimit është organ i pavarur shqyrtues dhe ushtron autoritetin, kompetencat, funksionet dhe përgjegjësitë e përcaktuara me Ligji Nr. 04/L-042 për Prokurimin Publik.

Struktura organizative e OSHP-se është si në vijim:

Kryetari i OSHP-së

Anëtarët e OSHP-së

Kryesuesi i Sekretariatit

Organi Shqyrtues i Prokurimit ka edhe administratën e shërbyesve civilë konform organogramit të OSHP-së, të cilin e aprovon Kryetari i OSHP-së.

Kryetari i OSHP-së përfaqëson, menaxhon dhe organizon punën e përditshme të OSHP-së në pajtim me nenin 102 të LPP-së.

Kryetari përfaqëson, menaxhon dhe organizon punën e OSHP-së dhe është përgjegjës për mbikëqyrjen e administrimit të përditshëm dhe veprimtarisë së OSHP-së.

Kryetari është i autorizuar të caktojë një anëtar për të organizuar dhe drejtuar punën e OSHP në një fushë të veçantë.

Në rast se kryetari mungon për shkaqe shëndetësore apo per shkaqe te tjera, kompetencat dhe funksionet e tij ushtrohen nga anëtari më i vjetër i OSHP-së.

Detyrat dhe përgjegjësitë e paneleve shqyrtuese:

Paneli Shqyrtues ka kompetencën, autoritetin, fuqinë dhe përgjegjësinë, nën kushtet e specifikuara në LPP, që të:

T`i shqyrtojë ankesat e palëve të interesuara në lidhje me shkeljet e pretenduara të Ligjit të Prokurimit Publik.

Të hedh poshtë ankesën e dorëzuar si të pabazuar apo si të atillë që nuk bie brenda kompetencave të OSHP-së.

Të vendosë për ankesat e drejtuara atij në pajtim me ligjin.

Të ndërmarrë veprime të tjera të arsyeshme për të përcaktuar nëse ka ekzistuar shkelje e Ligjit dhe, nëse po, çfarë masash të merren.

Të nxjerrë urdhra të përkohshëm dhe përfundimtarë.

Të marrë vendime për shpenzimet procedurale.

Eksperti shqyrtues

Eksperti shqyrtues, i cili caktohet sipas nenit 113 dhe 114 të LPP-së, bënë shqyrtimin e kryerjes së aktivitet të prokurimit përkatës si dhe vlefshmërinë e të gjitha pretendimeve të përfshira në ankesë.

Eksperti shqyrtues është i paanshëm, profesional dhe ka njohuri lidhur me zbatimin e aktivitetit të prokurimit, si dhe njohuri për Ligjin e Prokurimit Publik.

Eksperti shqyrtues është i obliguar që ta pajisë Panelin Shqyrtues me një vlerësim me shkrim mbi aktivitetin e prokurimit dhe vlefshmërinë e të gjitha pretendimeve të përfshira në ankesë.

Paneli Shqyrtues mund të kërkojë prezencën dhe dëshminë, gjatë një shqyrtimi të një Eksperti të Shqyrtimit, i cili ka trajtuar rastin, pa marrë parasysh nëse është anëtar i Sekretariatit të OSHP-së apo Ekspert i Jashtëm Teknik. Kjo kërkesë do të bëhet nëse Paneli konsideron që i nevojitet një ekspertizë e dhënë në çështje specifike teknike. Kjo mund të përfshijë, por nuk është e kufizuar në çështje të standardeve teknike, inxhinieri, financa, që përcakton sasinë e dëmeve.

Paneli Shqyrtues gjithashtu mund të kërkojë nga Kryetari i OSHP-së për emërimin e një këshilltari apo eksperti të pavarur shtesë në raste kur konsideron se kundërekspertiza duhet të sigurohet kur është e nevojshme të sigurohet evidencë shtesë.