Këshilltari Qoku e quajti Abazoviqin person që flet shqip e punon për serbët, por Kurti e uronte nga zemra dhe mezi priste të punonte ngushtë me të

“[Edi Ramës] i mjafton Abazoviqi që flet shqip dhe punon për serbët… Përndryshe, ne e dimë se është dëshmuar nga rasti Abazoviq se shqiptarët, kur e marrin detyrën e kryeministrit nga prapaskenat, nuk i shërbejnë kombit të vet, por të kundërtës”.

Kjo është një pjesë nga teksti i reagimit të Bekim Qokut, këshilltar i kryeministrit të Kosovës, Albin Kurti, më 27 janar 2024, një ditë para votimit historik të Talat Xhaferit si kryeministër i parë shqiptar në Maqedoninë e Veriut.

“A na duhet edhe një Abazoviq i ri në formën e Talatit?”, pyeste këshilltari Qoku, në reagimin e tij të ashpër kundër kryeministrit të Shqipërisë, Edi Rama, i cili i vlerësoi si historike arritjet e shqiptarëve në Maqedoninë e Veriut.
Siç mund të lexohet, në këtë status, këshilltari i Kurtit e portretizon ish-kryeministrin shqiptar të Malit të Zi, Dritan Abazoviq, si një person që punon për serbët dhe që nuk i shërben kombit të vet.

Pavarësisht këtij qëndrimi të ashpër ndaj Edi Ramës, por edhe ndaj Dritan Abazoviqit, këshilltari i Kurtit ka “harruar” se çfarë mendonte shefi i tij në Qeverinë e Kosovës, kur Abazoviq mori detyrën e kryeministrit të Malit të Zi, më 29 prill 2022.

Kryeministri i Kosovës, Albin Kurti, i ishte gëzuar shumë zgjedhjes së Dritan Abazoviqit si kryeministër i Malit të Zi. Në atë kohë, Kurti nuk shfaqte asnjë ngurrim për shqiptarin që u bë kryeministër duke fituar zgjedhjet si një kandidat i një partie jo-shqiptare, Ujedinjena Reformska Akcija (URA).

Kurti “e përgëzonte nga zemra” dhe “mezi priste të punonte ngushtë” me Dritan Abazoviqin, personin që nga këshilltari i Kurtit etiketohet që “flet shqip dhe punon për serbët”.

“E përgëzoj nga zemra Dritan Abazoviqin, kryeministrin e Malit të Zi, nga komuniteti shqiptar. Mezi pres të punojmë së bashku ngushtë për të adresuar sfidat e shumta me të cilat përballemi në rajon”, shkruante Kurti në urimin e tij.