Mbrojtja e Shalës kërkoi vizitë në Uzinën e Metalit në Kukës, ZPS-ja thotë se nuk është e nevojshme por nuk e kundërshton

Në parashtrimet e saj, Zyra e Prokurorit të Specializuar ka thënë se nuk është e nevojshme që të organizohet ndonjë vizitë në Uzinën e Metalit në Kukës sa i përket çështjes gjyqësore ndaj Pjetër Shalës.

Fillimisht, kjo ishte kërkesë e mbrojtjes së Pjetër Shalës, mirëpo sipas parashtrimeve të saj, ZPS-ja ka ardhë në përfundim se provat në procesverbal të cilat tashmë i posedojnë, e bëjnë të panevojshme këtë vizitë.

“Provat në procesverbal e bëjnë të panevojshme vizitën në Uzinën e Metalit Kukës për përcaktimin e akuzës ndaj të akuzuarit. Nëse Paneli megjithatë e konsideron të rëndësishme një vizitë në Fabrikën e Metalit Kukës për qëllime të gjetjes të së vërtetës, ZPS parashtron se ajo duhet të kryhet me shpejtësi, duke pasur parasysh konsideratat e sigurisë dhe logjistikës të përfshira”, thuhet në parashtrimet e ZPS-së.

Në parashtrimet e saj, ZPS-ja vazhdimisht ka theksuar se nëse Paneli është i qëndrimit se një vizitë e tillë është e nevojshme atëherë ajo duhet të kryhet me shpejtësi.

“Në përputhje me parashtresat e saj paraprake për këtë çështje, qëndrimi i ZPS-së është që ndërkohë që një vizitë në terren mund të jetë në ndihmë të Trupit Gjykues (“Panelit”), provat e regjistruara mbi planimetrinë e Fabrikës së Metaleve Kukës janë të mjaftueshme për të mundësuar vlerësimin e duhur të pretendimeve në aktakuzë. Siç shtjellohet më tej më poshtë, një vizitë në terren nuk është e nevojshme për përcaktimin e së vërtetës në këtë rast. Sidoqoftë, nëse Paneli e konsideron të nevojshme një vizitë në terren, ajo duhet të kryhet me shpejtësi, duke marrë parasysh sigurinë, koston dhe konsideratat logjistike të përfshira”, thuhet tutje.

Po ashtu, ZPS-ja e kryesuar nga prokurorja e Specializuar, Kimberly West ka theksuar se disa nga dëshmitarët në këtë çështje kanë dhënë përshkrim të detajuar sa i përket Uzinës së Metalit në Kukës. Sipas ZPS-së, disa nga dëshmitarët kanë vizatuar skica që ofrojnë përshkrim të detajuar të ambienteve të brendshme dhe jashtme të uzinës.

Tutje, në këtë parashtrim thuhet se një vizitë në terren nuk do t’i ndihmonte Panelit asgjë pasi që ndërtesa është e shkatërruar kryesisht dhe se vetëm një pjesë minimale e saj ka mbetur.

Ndryshe, gjatë muajit shkurt 2023 ka filluar gjykimi në këtë rast, ku më 21 shkurt Prokuroria dhe mbrojtja e viktimave kanë paraqitur deklaratat e tyre hyrëse, kurse më 22 shkurt janë dëgjuar deklaratat hyrëse të mbrojtjes së Pjetër Shalës, si dhe deklarata pa betim e tij.

Në mars 2023 ka filluar paraqitja e provave të Prokurorisë, ku janë dëgjuar 10 dëshmitarë, kurse në gusht ka filluar paraqitja e provave nga mbrojtësi i viktimave ku janë dëgjuar dy dëshmitarë.

Pjetër Shala u arrestua më 16 mars 2021, nga autoritetet belge dhe u transferua në Hagë më 15 prill 2021, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës.

Në aktakuzën e konfirmuar, Shala ngarkohet me përgjegjësi penale individuale në forma të ndryshme për krime lufte si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur në Kosovë dhe në lidhje me këtë konflikt.

“Krimet për të cilat akuzohet z. Shala u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej Ushtrisë Çlirimtare të Kosovës”, thuhet në komunikatë.