Qeveria heq dorë nga pronat në veri për të cilat i humbi rastet në gjykatë

Shumicën e rasteve gjyqësore në kontestet gjyqësore për tokën e shpronësuar në veri për vendosje të stacioneve policore i ka fituar Qeveria. Megjithatë, në dy prej tyre ka pasur paditës serbë që kanë fituar në të dyja shkallët. Qeveria ka paralajmëruar nxjerrjen e një vendimi përfundimtar ku nuk do të përfshihen pronat e paditësve që fituan rastet në gjykatë
Stacioni policor “Qendra” në Zubin-Potok, ku janë të vendosura edhe Posta e Kosovës dhe zyrat e Agjencisë së Regjistrimit Civil janë në pronë të shpronësuar nga Qeveria.
Vitin e kaluar dhjetëra prona u shpronësuan në emër të interesit publik, e ku më pas u ndërtuan stacione policore. E pronësinë e shtetit mbi prona të tilla e kanë kontestuar si në Zubin-Potok, ashtu edhe në Leposaviq mbi 27 paditës serbë.

Në dy prej pesë rasteve gjyqësore për shpronësim i kanë fituar paditësit, ndërsa tri prej tyre Qeveria.

Në bazë të vendimeve, në arsyetimin e tri rasteve që i ka fituar Qeveria, si në Themeloren e Prishtinës ashtu edhe në Apel, thuhet se vendimi administrativ mund të kundërshtohet në gjykatë vetëm kur merr formën e vendimit përfundimtar. Vendimet qeveritare për shpronësime në veri janë të formës preliminare e jo përfundimtare.
“Andaj duke u bazuar në nenin 15 par.1 nën par.1.2 të LKA-së ‘konflikti administrativ nuk mund të zhvillohet: 1.2 kundër akteve të nxjerra në çështjet rreth të cilave, sipas dispozitës së ligjit nuk mund të zhvillohet konflikti administrativ’, andaj në kuptim të nenit 9 të LKA-së lidhur me nenin 15 para 1.2 edhe kjo gjykatë e shkallës së parë, konstatohet se nuk janë plotësuar kushtet për të filluar proceduara e shqyrtimit të çështjes në procedurë gjyqësor të konfliktit administrativ”, shkruhet në aktvendimin e gjyqtares Liridona Ajeti-Kajtazi.
Në aktgjykimet ku Qeveria humbi rastin, gjykata vendosi t’i anulojë vendimet preliminare të Qeverisë dhe ato t’i kthejë në rivendosje. Dy paditës të tjerë kanë fituar rastin kundër Qeverisë për pronat e tyre në Zubin- Potok, derisa vendimet e shkallës së parë janë konfirmuar edhe në Apel. Në aktgjykimin për familjen Jakshiq thuhet se janë shkelur afatet nga Qeveria.
“Në rastin konkret organi i shpronësimit në mënyrë të rëndë ka shkelur rregullat e procedurës së parashikuar të nenit 10 të Ligjit për shpronësimin e pasurisë së paluajtshme dhe ka qenë i detyruar të fillojë nga dita kur të plotësohen kushtet e përshkruara me nenin 8 të të njëjtit ligj në afat prej 10 ditësh kalendarik me të cilin personat e interesuar kanë të drejtë të paraqesin komentet në lidhje me shpronësimin e kërkuar. Duke qenë se nuk janë respektuar rregullat e procedurës, gabimisht është konstatuar gjendja faktike që ka sjellë si pasojë vendimin e paligjshëm për pranimin e kërkesës”, thuhet në këtë aktgjykim.
Në aktgjykimin e nxjerrë prej trupit gjykues të kryesuar nga gjyqtarja Valbona Gjonbalaj në Themeloren e Prishtinës, thuhet, po ashtu, se e drejta në pronë është e patjetërsueshme.

“E drejta e pronës është e drejtë absolute dhe e garantuar nga të gjitha dokumentet ndërkombëtare dhe përjashtimisht mund të hiqet dhe të kufizohet për arsye ligjore të përcaktuara rreptësisht, nëse paraprakisht është vërtetuar interesi publik, i cili është përcaktuar me Kushtetutën e Kosovës, protokollin 1 të Konventës Evropiane për të Drejtat e Njeriut dhe Liritë Themelore. Në rastin konkret organi i shpronësimit në mënyrë të rëndë ka shkelur rregullat e procedurës së parashikuar të nenit 10 të Ligjit për shpronësimin e pasurisë së paluajtshme, dhe ka qenë i detyruar të fillojë nga dita kur të plotësohen kushtet e përshkruara me nenin 8 të të njëjtit ligj në afat prej 10 ditësh kalendarike, me të cilin personat e interesuar kanë të drejtë të paraqesin komentet në lidhje me shpronësimin e kërkuar”, thuhet në aktgjykim.
Për të gjitha vendimet e marra nuk është treguar se për cilat prona (parcela) bëhet fjalë shkaku i anonimizimeve në aktgjykime. Në proceset gjyqësore në shkallën e dytë, shteti nuk ka dhënë përgjigje në padi, përveç një rasti në Leposaviq.

Në Qeveri thonë se pronat do t’iu kthehen paditësve që fituan rastet, meqë në vendimin përfundimtar për shpronësim nuk do të përfshihen pronat e tyre.

“Ne kemi në posedim dy vendime të gjykatave, të cilat ndalojnë shpronësimin në raport me vetëm disa prona të qytetarëve të caktuar, disa individëve, që kanë bërë padi pranë gjykatave tona. Pra, ato nuk e anulojnë vendimin e Qeverisë për shpronësim. Prandaj Qeveria mund të vazhdojë me nxjerrjen e vendimit përfundimtar për shpronësim duke përjashtuar parcelat e individëve në fjalë sipas këtyre vendimeve gjyqësore”, ka thënë zëdhënësi i Qeverisë, Përparim Kryeziu.

Supremja e ka konfirmuar se nuk ka pranuar asnjë ankesë lidhur me këto raste. Qeveria vendosi të shpronësojë toka në veri në emër të interesit publik, ku më pas u vendosën kontejnerë që po përdoren nga policia. Disa prej lokacioneve ku janë bërë shpronësimet janë në zonat kadastrale Bistricë e Shalës, Dren, Leshak dhe Koshtove në Komunën e Leposaviqit dhe në zonat kadastrale Bërnjak, Zubin-Potok, Bregu i Madh, Banjë dhe Jasenovik i Epërm në Komunën e Zubin-Potokut. Policia nuk u është përgjigjur pyetjeve të KOHËS se sa stacione ndikohen si pasojë e fitoreve të paditësve në dy raste.

Lidhur me disa prej pronave janë mbajtur edhe protesta vitin e kaluar. Banorët serbë në veri, të cilëve iu shpronësuan pronat, patën mbajtur takim edhe me Avokatin e Popullit, të cilit i ishin ankuar për mungesë konsultimesh publike lidhur me ndërtimin e stacioneve të reja policore në veri.