Kompanitë e sigurimeve nënvlerësojnë dëmet në aksidente

Sipas ekspertëve të komunikacionit, në rast aksidenti automobilistik në Kosovë, kompanitë e sigurimit zakonisht kryejnë vetë vlerësimin e dëmit që do ta paguajnë. Sipas tyre, dëmi nënvlerësohet. Kjo praktikë vlerësimi, konsiderohet në shpërputhje me ato që aplikohen në shtetet e BE-së
Ekspertë të trafikut kanë kritikuar praktikat dhe procedurat e sigurimit të veturave. Sipas tyre, ato as nuk korrespondojnë me mënyrën se si është e rregulluar kjo çështje në vendet e Bashkimit Evropian.

Bekim Ahmeti, inxhinier i komunikacionit, ka ngritur si problem metodën e zhvlerësimit të dëmit për palën e dëmtuar, e cila konsiderohet e pafajshme, pasi sipas tij, mungojnë vlerësues të pavarur nga kompanitë e sigurimit.

“Kur pësoni aksident, rregullohet vetura si palë e dëmtuar dhe jo fajtore, por zhvlerësimin e veturës nuk e llogarisin. Ka instrument matës që e matin ngjyrën e automobilit. Kur bëjnë këtë matje ai vërehet që është ngjyrosur dhe menjëherë i zbret vlefshmëria”, ka thënë Ahmeti.

Ai ka rikujtuar se sigurimi nuk e mbulon dëmin e shkaktuar, pasi një veturë e riparuar nuk e ka vlerën e njëjtë sikur para aksidentimit.

E Valon Mehmeti nga grupi “Marakli t’kerreve”, ka thënë se problem është edhe koha e kompensimit, në rast se palët nuk janë pajtuar.

“Gjatë kohës që vetura është e prishur, sigurimi nuk bën zgjidhje për ta siguruar një veturë tjetër… Pjesa tjetër është që nëse nuk gjejnë gjuhë mirëkuptimi me kompaninë e sigurimit, procedura mund të zgjasë me vite pasi që shkon përmes gjykatës”, ka thënë Mehmeti.

E Uranik Kryeziu, që punon në një kompani sigurimesh në Gjermani, ka thënë se në këtë shtet të BE-së ekzistojnë vlerësuesit e pavarur e profesionalë.

“Praktika në Gjermani është që në rast aksidenti pala e dëmtuar e ka mundësinë të thërras një vlerësues profesional, i cili është i pavarur dhe bën një vlerësim të dëmit në formë të shkruar. Nëse ne si kompani e sigurimit nuk jemi të kënaqur apo nuk pajtohemi me opinionin, atëherë e angazhojmë vlerësuesin tonë të kompanisë”, ka theksuar Kryeziu.

Autoriteti mbikëqyrës e rregullues për çështjen e sigurimeve është Banka Qendrore e Kosovës (BQK). Në këtë institucion kanë thënë se me vlerësimin e dëmeve merren personat të licencuar nga BQK-ja

“Vlerësimi i dëmeve mund të bëhet vetëm nga personat përgjegjës brenda siguruesit apo personat e kontraktuar nga të siguruarit apo siguruesit, të cilët janë të licencuar nga BQK-ja për të ofruar një shërbim të tillë”, thuhet në një përgjigje të shkruar të këtij institucioni.