Moska njofton se po hap tre qendra votimi në SHBA, në zgjedhjet presidenciale të marsit

Rusia do të hapë qendrat e votimit në Shtetet e Bashkuara, në zgjedhjet presidenciale të planifikuara për në mars, në tri baza diplomatike ose konsullore, njoftoi të mërkurën ambasadori rus në Uashington Anatoli Antonov, raporton AFP.

Antoli Antonov e bën këtë njoftim në kontekstin ku marrëdhëniet mes dy vendeve janë në nivelin më të ulët që nga Lufta e Ftohtë, për shkak të luftës në Ukrainë.

Rusia, e shënjestruar nga një sërë sanksionesh të vendosura nga Perëndimi pasi dërgoi ushtrinë e saj për të sulmuar Ukrainën më 24 shkurt 2022, nuk ka vendosur ende nëse do të instalojë qendra votimi në shtetet e Bashkimit Evropian (BE) që etiketojnë “armiq”.

Zgjedhjet presidenciale në Rusi janë caktuar për më 17 mars.

Presidenti rus Vladimir Putin, i cili ka drejtuar Rusinë që nga viti 2000, njoftoi synimin e tij për të kandiduar për një mandat të pestë.

Ai do të qëndrojë në Kremlin të paktën deri në vitin 2030, kur të mbushë 78 vjeç.

Rizgjedhja e tij nuk ngre asnjë dyshim në një vend ku Vladimir Putin ka shtypur opozitën e tij.

TRE QENDRA VOTIMI

“Në SHBA planifikojmë të hapim tre qendra votimi, në ambasadën tonë në Uashington dhe në konsullatat në Nju Jork dhe Hjuston”, njoftoi të mërkurën, në një intervistë të publikuar nga ambasada ruse në Amerikë, Anatol Antonov.

Shtetet e Bashkuara i kanë dhënë Ukrainës armë kundër forcave ruse dhe vendet perëndimore kanë vendosur sanksione të rënda ekonomike ndaj Moskës.

Rusia njoftoi javën e kaluar se nuk ka vendosur ende të hapë qendrat e votimit në BE.

Zëdhënësja e Ministrisë së Punëve të Jashtme ruse, Maria Zaharova, ka paralajmëruar kërkesat për të garantuar sigurinë e disa qendrave të votimit dhe ka thënë se vendimi në lidhje me këtë do të merret deri në fund të janarit.

Mijëra rusë janë larguar nga vendi, shumë prej tyre banojnë në shtetet anëtare të BE-së, që nga fillimi i ofensivës ruse në Ukrainë në shkurt 2022.